Бокстан халықаралық ашық турнир өз мәресіне жетті

Қарасай ауданында соңғы жылдары қоғам мәселесіне айналған нашақорлық дертіне қарсы күрес бойынша жұмыстар жалғасуда. Ондай шараларға құқық қорғау органдарымен қатар жекеменшік ұйымдар мен белсенділер өз үлестерін қосып келеді. Соның дәлелі ретінде өткен аптаның жұмасы күні «Бокс нашақорлыққа қарсы» деген ұранмен Береке ауылында ашылу салтанаты болған халықаралық ашық турнирді айтуға болады.
«Береке» бокс клубының бастамасымен Алматы облысы «АқЖол» демократиялық партиясының қаржылай қолдауымен ұйымдастырылған жарысқа еліміздің түкпір-түкпірінен және Өзбекстан, Тәжікстан, Қырғызстан, Моңғолиядан келген жасөспірім былғары қолғап шеберлері қатысты. Олар 26-80 келі салмақ дәрежесі аралығында өзара мықтыларды анықтады.
Бокс додасының салтанатты рәсімін Елтай ауылдық округінің әкімі Біржан Махатов ашып, құттықтау лебізін білдіріп, спортшыларға сәттілік тіледі. Сондай-ақ жас дарындарды Қазақстандық әуесқой боксшы, 2000 жылы Олимпиада чемпионы, ҚР еңбек сіңірген спорт шебері Ермахан Ибраимов, «АқЖол» демократиялық партиясының Алматы облысы бойынша филиал төрайымы Мейраш Шынасилова, аудандық Ауған соғысы ардагерлер коғамының төрағасы Альхан Сайфуллин мен Жамбыл ауылы ақсақалдар алқасының төрағасы, ҚР құрметті азаматы Рахметолла Камзин да құттықтап, жарысқа қатысушыларға алғыстарын білдіріп, аталған турнир көршілес елдердің татулығы мен достығын нығайта түсетінін айтып, баршасына сәттілік тіледі.
Кіл мықтылар бас қосқан турнир үш күнге созылды. Оның барысында жас былғары қолғап шеберлері өздерінің күшін, төзімділігін және жеңімпаздарға тән нағыз жауынгерлік рухтарын көрсетуге бар күштерін салды. Шаршы алаңға шыққан әр боксшы жарыстың көркін қыздыра түсіп, өз елінің және облысының намысын қорғап, қарсыластарынан басым түсуге тырысты.
Жалпы әр жекпе-жек тартысты әрі қызықты өтіп, бәсекелестік рухы қарсыластарға деген құрметпен ұштасты.
Десе де кез келген жарыста жеңіс пен жеңіліс бар, демекші, байрақты бәсеке қорытындысы бойынша командалық ойында «Береке» бокс клубының спортшылары жерлестерін жерге қаратпады. Ерекше көзге түсіп, жақсы нәтижелерінің арқасында жеңімпаз атанып, турнир кубогін иеленді. Ал ақтық сынға дейін қарсыластарына дес бермеген Тәжікстан спортшылары екінші орынға табан тіреді. Өзбекстанның жас боксшылары жүлделі үшінші орынға қол жеткізіп, туған елінің мерейін асқақтатты.
– Береке ауылында осындай ауқымды халықаралық турнирді өткізуді көптен ойлап жүрген едім. Енді, міне бұл ойым іске асты. Оның ұйымдастырылуына барынша күш салып, жақсы деңгейде өткіздік деп ойлаймын. Арақашықтыққа қарамай, біздің шақыртуымыздан бас тартпай, сонау Моңғолия, Өзбекстан, Тәжікстан, Қырғызстаннан келген спортшыларға алғысымды білдіремін. Сондай-ақ жастар арасында адамның психикалық және физикалық денсаулығына қауіп төндіретін нашақорлықтан аулақ болып, саламатты өмір салтын ұстануды насихаттауға бағытталған турнирдің өтуіне атсалысқан жандарға да ризашылығым шексіз.
Алдағы уақытта осындай шараларды ұйымдастырып, спорт маңыздылығын барынша дәріптеуге атсалысатын боламыз, – деді бокс додасының ұйымдастырушысы, бапкер Асқар Құралов.

Ақтоты МЫРЗАБЕКҚЫЗЫ.