Балабақшаларға Face ID жүйесі енгізілді

Өткен жылдың тамыз айынан бастап Қарасай ауданының аумағында орналасқан мемлекеттік және мемлекеттік тапсырысты алатын балабақшаларда «QR және Face ID» жүйесі іске қосылды. Соған сәйкес, күнделікті таңертең бөбекжайға келетін балалар өз тобына кірер алдында «фейс-бақылау», яғни бет сканерлеуінен өтеді. Бұл, бір жағынан, қауіпсіздік шарасын жетілдіру үшін, екінші жағынан бюджет қаражатының мақсатты түрде жұмсалуын қадағалау үшін жасалып отыр.

Анығырақ айтқанда, соңғы жылдары елімізде балалар санының артуына байланысты мектепке дейінге және орта білім беру мекемелерінің жетіспеушілігі артқан. Соған сәйкес елімізде жекеменшік білім ошақтары көптеп ашыла бастады. Ал 2019 жылы білім министрлігінің әзірлеген мектепке дейінгі, мектеп және университеттік білім беру саласында жан басына шаққандағы қаржыландыру әдістемесінің аясында олардың көбі жан басына шаққандағы қаржыландыруға көшіп, мемлекет тарапынан қаржылай қолдау ала бастады. Соның арқасында балабақша басшылары педагогикалық қызметкерлердің еңбекақысы, ағымдағы жөндеу жұмыстары, коммуналдық қызметтер, интернет ақысы секілді тұрақты шығындарды өтеп отырды.
Алайда жасалған тексеріс нәтижесінде, мемлекеттен қолдау алған ұйымдардың көбі қойылған талаптарды орындамай, қаражатты өз мүдделеріне жұмсағандары белгілі болды. Әсіресе кейбір балабақшада бұрмалау фактілері анықталды, яғни балалардың іс жүзіндегі саны ресми құжаттарда жазылғаннан әлдеқайда аз болып шыққан. Мұндай әрекеттер бюджет қаражатының артық жұмсалуына әкеп соқтырды. Осы мәселені шешу мақсатында бірқатар шаралар атқарылды. Соның бірі өткен жылдары тиісті құзырлы органдардың рұқсатымен балабақшаларда пилоттық жоба ретінде іске қосылған биометриялық аутентификация жүйесі (FaceID). Оның көмегімен арнайы қосымшаға барлық қажетті деректер тіркеліп, балғындардың бөбекжайға келіп-кетуі күнделікті тексеріліп отырады. Яғни, балабақшаға кіргенде телефон камерасы арқылы тәрбиеленушінің бет-жүзі сканерленіп, ақпарат электронды табельге жүктеледі. Осылайша, билік басындағылар мемлекет бюджетінің мақсатты жұмсалуын қадағалап, сыбайлас жемқорлық тәуекелдерінің алдын алмақ.
Мұндай жұмыстар Қарасай ауданында жүргізілді. Нақтырақ айтқанда, аудандық білім бөлімінің мәліметіне сүйенсек, қазіргі уақытта ауданда мектепке дейінгі тәрбиемен және оқытумен 13110 бала қамтылған. 193 балабақша жұмыс істейді. Оның 10 – мемлекеттік, 183 – жекеменшік. Өткен жылдың тамыз айында аудан аумағындағы барлық бөбекжайларға жоғарыда айтып өткен бастама аясында «QR және Face ID» жүйесі енгізілген. Жиналған биометриялық деректер qr-portal.gu.almobl.kz порталына жүктеледі.
Онымен жұмыс істеп отырған ұйымның бірі – Қаскелең қаласындағы 125 орындық «Немере» жекеменшік балабақшасы. Оның директоры Айнұр Омарованың айтуынша, жалпы бұл бастаманың механизмі жеңіл әрі ыңғайлы.
– Біздің тәрбиешілеріміз телефондарына арнайы қосымшаны жүктеп алды. Әрқайсысы өз тобындағы балаларды таңертең қарсы алып, «фейс-бақылаудан» өткізу үшін телефонмен суретке түсіріп отырады. Барлық ақпарат qr-portal.gu.almobl.kz порталына жіберіледі. Бір ыңғайлылығы біз есеп ретінде жылда толтырып отыр атын табельге ақпарат өзі электронды түрде енгізіліп отырады.
Әрине, біздің тәрбиелену-шілеріміз кішкентай болғандықтан, арасында суретке түскісі келмей жылап, қарсылық білдіретін кездер болып тұрады. Алайда баланың тілін тез таба алатын тәрбиешілеріміздің арқасында ондай жағдайлар тез шешіледі. Қосымшаға келетін болсақ, іске қосылғалы бері қиындықтар туындаған жоқ. Қызметкерлер тез бейімделіп, бүгінде онымен оңай жұмыс істеуде, – деді Айнұр Ермекбайқызы.

Ақтоты МЫРЗАБЕКҚЫЗЫ.