Бала көңілін қуантқан ерекше орталық

Абай ауылында орналасқан «Ерекшем» оңалту орталығына биыл бір жыл толып отыр. Осыған орай мекеме басшылығы ұлыстың ұлы күнін ұлықтап, Наурыз мейрамын атап өтті.

Райымбек ауылдық округі қарасты Абай ауылында орналасқан қарасайлық мүгедектігі бар балаларға арналған «Ерекшем» оңалту орталығы – өмірдің қиын жағдайына тап болған ерекше жандардың басын қосатын, оларды жаңа өмірге бейімдейтін, қалыпты өмір дағдыларына оралуына ықпал ететін бірден-бір мекеме. Аталмыш ауылдағы ерекше балалар мен олардың ата-аналарына септігі тиіп жатқан орталыққа биыл бір жыл толды.
Осы сәтті атап өту және де бір жылда атқарған жұмыстарын көрсетуді мақсат еткен мекеме басшылығы келіп жеткен Наурыз мейрамымен үйлестіріп, ауқымды мерекелік шара өткізді. Оған ата-аналар қауымы мен құрметті қонақтар арнайы шақырылды.
Шараның шымылдығын оңалту орталығының негізін қалаушы, көп балалы ана Қаршыға Амантаева ашып, жиналған бүлдіршіндер мен ата-аналарға жақсы тілегін жеткізіп, мекемені ашу кезінде оның жұмысы әрі қарай дамуына үлестерін қосып жүрген бірқатар жандарға алғысын жеткізді.
Орталық директорынан кейін жоғарыда атап өткен жаны жомарт азаматтар шығып, балаларға деген ізгі тілектерін білдіріп, осындай мекемелердің еліміздің әлеуметтік қорғау ісіне қосқан үлестері ұшан теңіз екенін айтып, Қаршыға Мансұрқызы мен ұжымға алғыстарын білдіріп, сәттілік тіледі.
Жалпы мерекеге орай бұл күні орталық аумағында киіз үй тігіліп, салт-дәстүрлер жаңғырып, күйлер күмбірлеп, билерден шашу шашылды. Қазақи нақыштағы сәнді киімдер киген балалар өнерлерін ортаға салса, олардың ата-аналары таланттардың өнерлерін тамашалады. Одан кейін барлығы дәмді тағамдарға толы дастарханнан дәм татты. Сондай-ақ мультфильм кейіпкерлерінің киімін киген әртістермен көңіл көтеріп, есте қаларлық мерекелік әсер алды. Сонымен қатар шара барысында орталық басшылығы тарапынан қолдау білдірген азаматтарға Алғыс хаттар табыс етілді.
Айта кетейік, «Ерекшем» оңалту орталығының негізгі міндеті – қиын жағдайға түскен балалардың қажеттіліктерін ескере отырып, олардың даму деңгейін арттыру, ауру баласы бар ата-аналарға барынша қолдау көрсету. Мұнда аутизм, сөйлеу дамуының тежелуі, ДЦП секілді церебральді сал дертіне шалдыққан балалар әртүрлі ем-дом ала алады. Мекеме өз қызметін 2023 жылы бастаған болатын. Алайда орталықтың қағаз мәселелері тек 2024 жылы толық шешімін тауып, сол жылдан бастап ресми түрде жұмыс істеуде.
Мұнда денсаулығында кінәраті бар балаларға емдік дене шынықтыру, массаж, ми қыртысын дыбыспен ынталандыруға арналған «Томатис» әдісі, иппотерапия секілді емдік шаралары көрсетіледі. Барлық кабинет толықтай қажетті құралдармен жабдықталған. Сондай-ақ орталықта сөйлеу және психикалық дамуында проблемалары бар адамдармен жұмыс істейтін логопед мамандары да бар. Бүгінде жалпы 12 қызметкер жұмыс істейді. Мұнан бөлек балаларға және ата-аналарға ыңғайлы болу үшін тасымалдау көлігі де қарастырылған.
Істегеніне көп уақыт болмаса да «Ерекшем» оңалту орталығының жұмысы көңіл қуантады біраз уақыт осында ем-домын алып жатқан балалардың өн бойындағы өзгерістері жақсы.
Жоғарыда айтып өткеніміздей, мекеменің негізін қалаушы жеке кәсіпкер, көп балалы ана Қаршыға Амантаева бұл бастаманы іске асыру үшін «Бастау бизнес» бағдарламасына қатысып, үш мәрте мемлекеттік қаржылай қолдауға ие болған.
Бүгінде мұнда 50-ге жуық бала ем қабылдап, тірек қимылдарын жақсартуда.

Ақтоты МЫРЗАБЕКҚЫЗЫ.