Бұрыңғы өнер мектебінің орнына жекеменшік мектеп ашылады

Соңғы екі жылда Қарасай ауданының білім саласында көптеген жақсы өзгерістер орын алуда. 2024 жылы өңірде жеті мектеп салынып, қолданысқа берілсе, ағымдағы жылы үш білім ордасының құрылыс жұмыстары жүргізіліп, аяқталуға жақын. Оған қоса мемлекеттік білім ошақтарымен қатар жекеменшік мектептердің де қатары өсіп келеді. Бүгінде ауданда 13 жекеменшік білім ұясы бар. Ал ағымдағы жылы Қаскелең қаласында жеке кәсіпкер Нұртаза Елеусізовтің бастамасымен тағы бір сондай мекеменің құрылыс жұмыстары жүргізілуде.  

    Кәсіпкер жаңа білім ошағын салу үшін бұрынғы Өнер мектебінің жерін сатып алған. Айта кетейік, аталған білім ордасының іргетасы 1969 жылы қаланған. Көптеген жылдар бойы ол ауданның мәдениет саласының дамуына өз үлесін қосып, бүгінде белгілі біраз қарасайлық өнерпаздардың талантын жетілдірген өнер ошағы болып келген еді. Алайда 2000 жылы мемлекет тарапынан қаржылай қолдау болмағандықтан, жекеменшікке өтіп, «Серпін» ЖШС-не тиесілі болған. Ал 2024 жылы оны қазіргі қожайыны Нұртаза Бақытұлы өз иелігіне алған.

– Жалпы Қаскелең қаласында жаңа форматта білім беретін мектепті ашу туралы ой бұрыннан болған еді. Алайда қажетті жер телімін таба алмай жүрген едік. Сөйтіп, 2024 жылы бұрынғы Өнер мектебінің ғимараты сатылатындығын көріп, қожайынына хабарластық. Ол кісі  бұл жерді неге сатып алғымыз келгенін сұрағанда «мектеп салу үшін» деп едік қуана келісімін берді.

Осылайша, өткен жылдың тамыз айында ескі нысанның жері менің меншігіме өтті. Біраз уақыт құрылысқа рұқсат беретін құжаттарды алу жұмысымен жүрдік. Нәтижесінде тек 2025 жылы мәселе шешімін тауып, құрылыс басталды. Өнер мектебінің тозығы жеткен ғимаратын бұзып, жер учаскесін тазалап, жаңа нысанның іргетасын қаладық, – деді кәсіпкер.

Нұртаза Елеусізовтің айтуынша, үш қабатты 500-ден астам оқушыға есептелген жаңа мекемеге «Ғибрат» деген атау беріледі. Мұнда балалардың толыққанды білім алуына, саламатты өмір салтын қалыптастыруға барлық жағдай жасалады.

Мектеп жаңа электронды жүйелермен, заманауи компьютерлік техникалармен, интерактивті электронды тақталармен, жоғары жылдамдықты интернетмен, мультимедиялық кабинеттермен жабдықталады. Оқушылар демалып, кітап оқып, қажетті ақпараттық материалдармен жұмыс істей алатын шағын кітапхана орналастырылады. Жалпы балалардың демалатын, тамақтанатын орны, сабақ оқитын 31 кабинет талапқа сай жасақталады. Сондай-ақ мектеп ауласында денешынықтыру сабақтарына арналан шағын алаң салынбақ.

Басқа жекеменшік оқу орындарынан өзгешілігі бұл мектептің басты бағыты – қазақ халқының ұлттық құндылықтарын дәріптеу. Соған сәйкес оқушылар үзіліс уақыттарында сабақ бағдарламасының қосымшасы ретінде жетіген, домбыра секілді ұлттық аспапттарда ойнауды үйренетін болады. Яғни балаға аталған аспаптарды машықтану үшін жеке үйірмелерге қатысудың қажеттілігі болмайды.

Одан бөлек мұнда ағы

лшын тілімен математика пәндері тереңдетіліп оқытылады. Ал 9 сыныптан бастап балалармен IELTS бойынша жұмыс жүргізіліп, түлектерге шет елдік оқу орындарына түсуге қолдау көрсетіледі. Бұл үшін болашақ мектеп басшылығы арнайы кәсіби келісімшартпен жан-жақтан білікті ұстаздарды әкелуді жоспарлап отыр. Қазірдің өзінде мұғалімдер арасында іріктеу жүргізілуде.

Құрылыс барысына келетін болсақ, мұнда бәрі ойдағыдай. Жұмысшылар ғимараттың екінші қабатын толықтай қалап, үшіншісін бітуге жақын. Соңғы қабаттың кірпіші толығымен қаланып болған соң, төбе жабындысын жабу жұмыстары жүргізіледі. Одан кейін ішкі және сыртқы әрлеу, электр желілерін жүргізу, есік, терезе орнату, кафель жабыстыру, ауланы абаттандыру жұмыстары басталады.

Кәсіпкердің айтуынша, алғашқы жоспар бойынша нысанның құрылысы ағымдағы жылы аяқталуы керек еді. Алайда бастапқыда кәсіпкерде мектепті салуға қаражат жеткіліксіз болғандықтан, «Jusan Bank» арқылы несие рәсімдеу жағы қолға алынған еді. Алайда банк тарапынан дұрыс жұмыс атқарылмағандықтан, қаражат уақытылы бөлінбеген. Қазір ол басқа банкпен келіссөз жүргізуде.

– Егер жаңа банкпен келіссөздер табысты шешіліп, ақша уақытылы берілсе, құрылысқа қосымша 100 жұмыскер тартылып, қыркүйек айында мектеп жұмысын бастайды. Ал кешіктірілсе, онда мектеп 2026 жылы ғана қолданысқа беріледі. Дегенмен қазіргі сәтте білім ошағын жаңа оқу жылына дейін ашу бағытында белсенді жұмыс атқарып жатырмыз, – деді сөз соңында Нұртаза Бақытұлы.