Ауылдастарының алғысын арқалаған азамат

«Ауылына қарап, азаматын таны» деген ұлтымыздың ұлағатты сөзі бар. Осы бір орамды ойды айтқанда көз алдымызға елі үшін еңбек еткен адамдар елестейді. Әсіресе, халқына қалтқысыз қызмет жасап, туған өлкесінің өсіп-өркендеуіне өлшеусіз үлес қосып жүрген ауыл әкімдерінің табандылығын айтсақ болады. Жұртына жақсы ісімен жақын болған мұндай азаматтар Қарасай жерінде жоқ емес. Солардың бірі – жас та болса байсалды басшы атанып, Жібек жолы ауылдық округін басқарып отырған Дидар Нұрақынов.
Көп мақтауды жаны сүймейтін бұл азаматтың бүгінгі таңда ауылының ахуалы үшін атқарып жатқан жұмыстары жетерлік. Ол «округ әкімі» деген лауазымға шынайы еңбектің үлгісін көрсетіп, ел алғысын арқалап жетті. Сондықтан оның қызметтік жолы да, осы уақытқа дейінгі өмір өткелдері де көптің көңіліне жақсы ой салады деген сенімдеміз. Ендеше, 23 маусым – Мемлекеттік қызметшілер күніне орай, Жібек жолы ауылдық округінің әкімі Дидар Құрманжанұлы жайлы сөз етсек артық болмас.

Кейде пендешілік ойға беріліп, әкімдерді сырт көзбен көріп сынағанда оларды ауқатты отбасынан шыққандай елестетеміз. Бірақ Дидар Нұрақынов ондай жандардың қатарынан емес. Әкесі Құрманжан Келдибаев жай ғана шаруаның адамы болса, анасы Қаныша Қадірқызы мектептің еден жуушы қызметін атқарған. Хантәңірі тауының етегінде дүниеге келген Құрманжан ағамыз бен Қаныша әпкеміз өнегелі отбасыны орнықты етіп, төрт баланы бағып-қақты. Біз таныған Дидар – осы шаңырақтың үшінші перзенті әрі егіздің сыңары. Оның Гүлнұр атты әпкесі тұрмыста, бүгінгі таңда Павлодар облысына қарасты Аққулы ауылында тұрады. Өзінен үлкен ағасы Ернұр Жамбыл ауданында мал шаруашылығымен айналысады. Ал Дидар дүниеге келген күні араға 10 минут салып өмір есігін ашқан Динара болса Жаркент қаласының келіні атанып отыр.
Дидар Нұрақынов – Алматы облысына қарасты Жамбыл ауданының Бозой ауылының тумасы. 1992 жылы осы елді мекенде кіндік қаны тамғанымен, 8 жасынан бастап Қарасай жерінде тұрып келе жатыр. Шамалған бекетінің суын ішіп, ауасымен тыныстап, топырағына аунап өскен бала. Осындағы жаңа қазақ орта мектебінде (қазіргі Ахмет Байтұрсынұлы атындағы) 9 сыныпқа дейін оқыды. Одан кейін Алматы қаласындағы Абай атындағы колледжінің «құқықтану» мамандығына түсіп, оны 2010 жылы аяқтады. Ал жоғарғы оқу орнын Алматы үздіксіз білім беру университетінде оқыды. Мұнда «дене шынықтыру және спорт» бағытында білім алып, оны 2013 жылы тәмамдады. Дәл осы мамандықпен ол 2011 жылы Шамалған бекетіндегі Ы.Алтынсарин атындағы орта мектепте алғаш еңбек жолын бастаған. Уақыт өте келе ұстаздық қызметті қатар алып жүріп, жергілікті әкімдікте жұмыс істеуді жөн көрген. Сөйтіп, мектеп директоры Жанар Кулиеваның рұқсатымен әрі қолдауымен округ әкімдігіне 2014 жылы спорт жөніндегі нұсқаушы болып жұмысқа орналасты. Бұл мекемеде 2017 жылдың тамызына дейін істеп, бірден Шамалған ауылдық округінің әкімдігіне ауысты. Сол жылдары бұл округті Бексұлтан Ақылбек (қазіргі аудан әкімінің орынбасары) басқарып отырған шақта спорт жөніндегі нұсқаушы ретінде жемісті еңбек етіп, тәжірибе жинақтап, бір жылдан кейін мемлекеттік қызметші ретінде әкімдіктің бас маманы лауазымына ауысты. Осылайша Дидар Құрманжанұлы мұғалімдік жұмысты тастап, халыққа қызмет ету үшін мемлекеттік қызмет саласына бет бұрды. Оның осы бір еңбек жолына қолдау білдірген, ұстаздық еткен, тәлімгер ретінде жол нұсқаған мектеп директоры Жанар Шолпанқұлқызы мен қазіргі аудан әкімінің орынбасары Бексұлтан Ақылбекұлының еңбегі зор. Олар жайында Дидар мырза әңгіме барысында ерекше тоқталды.
«Мені алғаш жұмысқа алып, сенім артқан Ы.Алтынсарин атындағы орта мектептің директоры Жанар Шолпанқұлқызына алғысымды білдіргім келеді. Маған, шынымен, көп көмегін тигізді. Мектеп қабырғасында сабақ беріп жүргенде әкімдікте қосымша жұмыс істеуіме рұқсат етті. Сондықтан әлі күнге дейін ол кісіге рақметімді айтамын. Одан кейін мемлекеттік қызметші ретінде жұмыс істеуіме, тәжірибе жинақтауыма мүмкіндік берген Бексұлтан Ақылбекұлының қолдауын да ерекше атап өткім келеді. Ағалық ақылын айтып, менің осы салада шыңдалуыма себепкер болған азаматтардың бірі», – деді ол
Дидар Құрманжанұлы Шамалған ауылдық округінде 2018 жылдың қыркүйегіне дейін қызмет етті. Одан кейін Жібек жолы ауылдық округінің әкімдігіне қайта оралып, бұл мекемеде спорт жөніндегі нұсқаушы болып, сондай-ақ әдеттегідей бұрынғы мектебіндегі ұстаздық міндетін де қатар алып жүрді. Бірақ ол дене шынықтыру пәні ретінде мұғалімдік жұмысын 2022 жылы оқу жылымен бірге аяқтап, түбегейлі мемлекеттік қызмет саласына кетті. Сондай-ақ ол осы жылы білімін жетілдіру мақсатында Қонаев университетінің «Мемлекеттік және жергілікті басқару» мамандығына оқуға тапсырып, оны 2024 жылы аяқтады.
Дидар Нұрақынов Жібек жолы ауылдық округінің әкімдігінде жетекші маман, округ әкімінің орынбасары, арасында округ әкімінің міндетін атқарушы сияқты жауапты қызметтерде жұмыс істеді. Осы кезеңдерде ол бірнеше округ әкімдерімен әріптес болып, жақсы қарым-қатынас орнатып, әрбірінің сенім үдесінен шыға білді. Әлі күнге дейін жетекшілік еткен басшыларға ыстық ықыласын жоғалтқан емес.
«Жібек жолы ауылдық округінің әкімдігінде бірнеше басшының жетекшілігімен қызмет істедім. Округтің дамуы мен өсіп-өркендеуі жолында әріптес болып біраз жұмыс атқардық. Қай әкіммен істесем де әрбірінен үйренерім көп болды. Атап айтқанда, округті басқарған Сабырбек Хамитұлы, Ғалия Матанқызы, Алпамыс Айдынұлы, Эльмира Алтынбекқызы сияқты басшылармен бір ортада еңбек еткеніме қуанамын. Ол кісілердің нұсқауымен мемлекеттік қызметтің міндеттерін жете түсініп, тәжірибе жинай білдім. Сондықтан бәріне айтар алғысым көп», – деп бұрынғы әріптестеріне ризашылығын білдірді.
Биыл Дидар Құрманжанұлының округ әкімі болып қызмет атқарып жатқанына бір жыл болды. Өткен жылдың маусымында сайлауда бақ сынап, жергілікті халықтың қолдауына ие болған еді. Содан бері елмен бірге біте қайнасып, өзі туып-өскен өлкенің дамуына бар күш-жігерін салып келеді. Оның атқарып жатқан жұмысына да, басшылық қызметіне де тұрғындар дән риза. Бір жылдың ішінде аудан әкімі Жасұлан Естеновтің бастамасымен округ аумағында біраз жұмыстар атқарылды. Әлі де жемісті жобалар қолға алынуда. Олардың маңыздыларына тоқталмастан, Дидар Нұрақынов басқаратын Жібек жолы ауылдық округі жайлы азды-кем ақпарат жеткізсек артық болмас.
Бұл өлке – аудан аумағындағы халық саны бойынша көп шоғырланған округтердің бірі. Құрамына Жібек жолы, Көлащы, Тұрар ауылдары мен Жыңғылды, Құрқұдық разъездері кіреді. Тұрғындардың саны – 45 мыңға жуық. Оның 90 пайызын қазақтар құраса, қалғаны өзге ұлт өкілдерінің үлесінде.
Округте жүйе құраушы ретінде бір ірі және бес орта өндірістік кәсіпорын бар. Атап айтқанда, «АзияАгроФуд» АҚ және «Алтын таға» , «Chemolgan Food Station», «КазПолиснаб», «Food Distribution Company» сынды компаниялар жергілікті халықты тұрақты жұмыспен қамтып отыр.
Ауылдардың ахуалын арттыру мақсатында жоғарыда атап өткендей түрлі жобалар жүзеге асырылуда. Олардың жай-жапсарын округ әкімі Дидар Құрманжанұлы кеңінен әңгімелеп берді. Оның сөзіне сүйенсек, Тұрар ауылында су жүйесі қалпына келтіріліп, 400 тұрғын ауызсуға қол жеткізсе, алдағы уақытта Жібек жолы мен Көлащы елді мекендерін де осындай жүйелі жұмыс атқарылмақ. Бүгінгі таңда аталған ауылдарда сумен қамтамасыз ету бойынша жобаның құны анықталып, мемлекеттік сараптамадан өтуде.
Түнгі жарықтандаруға тоқталар болсақ, былтыр Жібек жолы ауылындағы 1,1 шақырымды құрайтын Ордабасы көшесіне жарық шамдары орнатылды. Бұл істің басы-қасынан округ әкімі Дидар Нұрақынов өзі табылып, жұмыстың орындалуын қадағалады. Ал биыл Ақжазық, Сәтбаев, Достық көшелерінің түнгі жарығы реттелмек. Қазіргі уақытта оған қатысты бюджеттік өтінім берілген.
Осы уақытқа дейін округ тарихында болмаған ауқымды жұмыстың тағы бірі – 14 көшеге бірден орташа жөндеу. Атап айтқанда, Жібек жолы ауылындағы Кенесары, Қ.Әбділдә, Қорқыт баба, Көксаз, Жетісу, Жаңалық, Жаңқожа батыр, Ордабасы көшелері, Тұрар ауылындағы Қожахметов, Т.Бокин, Ж.Бәрібаев, И.Панфилов, Болысов көшелері, сондай-ақ Көлащы ауылындағы С.Шалғымбай көшесі реттеледі. Бұл жұмыстар «Ауыл – ел бесігі» бағдарламасы аясында атқарылады.
Спорт саласын дамыту жағы да қолға алынған. Алдағы уақытта Жібек жолы ауылының Байжарасов көшесінде шағын футбол алаңы салыну жоспарланса, Мәдениет көшесінде ауқымды спорт кешені бой көтермек.
Мәдениет пен денсаулық саласында да ауыз толтырып айтатын жаңалықтар жетерлік. Мәселен, жақында Жібек жолы ауылында 200 адамға арналған Мәдениет үйінің құрылысы басталды. Нысанды қолданысқа беру келесі жылға жоспарлануда. Ал медицина бағытына тоқталсақ, келешекте Көлащыда үлкен аурухана, Тұрар ауылында дәрігерлік амбулатория салу көзделуде. Қазіргі уақытта екі нысанның да жобалық-сметалық құжаттамасына қатысты жұмыстар қолға алынуда.
Жоғарыда атап өткен әр салаға қатысты жүйелі жұмыстардың барлығы – Жібек жолы ауылдық округін дамытуға арналған байыпты бастамалар. Әрине, әр істің мұқият қадағалануы маңызды. Ал жауапкершілік алдымен округ әкіміне жүктелетіні анық. Бұл тұрғыдан қарағанда біз сөз етіп отырған округ басшысы Дидар Нұрақыновтің қарым-қабілеті жетеді деген сенімдеміз. Өйткені оның жетекшілік қызметі де, ауылдық округ үшін атқарып жатқан еңбегі де жұрттың көңілінен шығуда. Сондай-ақ әлеуметтік желі арқылы да оның жұмысқа деген жауапкершілігі айқын байқалады.
Дидар Құрманжанұлы – жұмыста білікті басшы, әріптестерінің ортасында сыйластығы жарасқан азамат болса, отбасында адал жар, ардақты әке. Ол 2018 жылы Ақмарал есімді қызбен шаңырақ көтеріп, шырайлы Шығысқа күйеу бала атанды. Сүйген жары ұстаздық қызметтің тізгінін ұстаған. Бүгінде екеуінің Айбар есімді ұлдары бар. Алдағы уақытта бұл шаңырақта шаттық шамы тағы жанып, бір сәбидің күлкісі естілетіндей жақсы жаңалық күтілуде. Жаратушы Жаппар иеміз сол күннің қуанышына жеткізсін деген тілегіміз бар.
Адам баласы қамшының сабындай қысқа ғұмырында қайғыны да, қуанышты да, жақсыны да, жаманды да көретіні ақиқат. Сол сияқты Дидардың өмір жолында өкінішті сәттер жоқ емес. Осыдан тура бір жыл бұрын аяулы анасынан айырылып, жер қойнына тапсырды. Келместің кемесіне мініп кеткен ардақты жанын жоғалтқанына Дидар әлі де сенгісі келмейді. Анасының алдындағы перзенттік парызы жайлы әңгіме қозғағанымызда көз жасына ерік берді. Әрине, тоғыз ай, тоғыз күн тар құрсағында әлдилеген ардақты адамнан ерте айырылу кімге жеңіл болсын.
«Мен осы округ әкімі лауазымына тағайындалғаныма анам қатты қуанды. Алайда бір ай өткен соң, сырқатын жеңе алмай, өмірден өтіп кетті. Әрине, бір ғана өкініш бар: «әлі де балаларының, немерелерінің қызығын көріп кетсе ғой!» деген. Амал қанша? Алланың жазғанына көнеміз. Оның аналық мейірімін, тәрбиесін көріп өскеніме қуанамын және ұмытпаймын», – деп ол анасын сағынышпен еске алды.
Дидар Құрманжанұлы өзін осындай сын-сағатта қолдап, жұмысының алға жылжуына қолғабыс еткен әріптестерінің орны ерекше екенін жеткізді. Округті дамыту жолында атқарып жатқан жұмыстардың нәтижелі болуына әкімдіктегі әр қызметкердің үлесі бар екенін айрықша атап өтті. Әсіресе, өзінің орынбасарлары – Дәулетжан Модинұлы мен Ержан Әлиұлының жетекшілік қызметі бір төбе болса, әр саланы қадағалап, жауапты міндетін атқарып отырған мамандарының табандылығы бір бөлек.
Өскен жерінің мүддесін ойлайтын Дидардың алдағы арманы – әрдайым ауылының мәртебесі биік болуы. Ол осы уақытқа дейін атқарған жұмысының ел алдында еленуі алдымен аудан әкімі Жасұлан Естеновтің арқасы деп біледі. Аудан басшысының ықпалымен талай іргелі істер атқарылып, ауылдың тұрмыс-тіршілігі жақсарып келеді. Бұл жайында Дидар мырза ерекше тоқталып, ауыл үшін еңбегін аямайтынын жеткізді.
«Жібек жолы ауылдық округінің даму көрсеткіші жақсы жағынан байқалса, алдымен ол аудан әкімі Жасұлан Тоққожаұлының еңбегі дер едім. Сондықтан аудан басшысына айтар алғысым көп. Байыпты бастамаларға үнемі қолдау көрсетіп, кез келген туындаған мәселенің оңтайлы шешілуіне ықпал етіп келеді», – деді округ әкімі Дидар Нұрақынов.
Жұртшылықтың жақсы сөзін естіп, ел алғысын арқалап жүрген Дидардың алдағы ісіне жақсылық тілейміз! Өскен ауылының туын жықпай, туған өлкесінің абыройын ойлайтын азаматқа тек қана сәттілік серік болсын дегіміз келеді.

Дидар МӘЛІКҰЛЫ