Ауданда жаңа прокурор

Қарасай ауданында үш жылдан астам жемісті қызмет еткен Жәнібек Жақаев Бас Прокурордың бұйрығымен Алматы облысының орталығы – Қонаевтың прокуроры болып тағайындалды. Ал осы қалада заң қадағалаушы органда істеген Айдос Шорманов осы аптадан бастап Қарасай ауданының прокуроры қызметіне ауысты.
Прокурорлардың бірімен қоштасып, екіншісімен танысу үшін аудан әкімдігінде жиын өтті. Оған Алматы облыстық прокурорының бірінші орынбасары Қанат Мамаев арнайы қатысып, аудан активіне және зиялы қауым өкілдеріне жаңа прокурордың еңбектерін бағалап, олардың қызметіне қатысты ақпаратпен бөлісті.

Жиын барысында алдымен 2022 жылдан осы уақытқа дейін аудан прокуроры болған Жәнібек Оразбекұлы сөз сөйлеп, Қарасай жерінде атқарылған нәтижелі жұмыстарға тоқталып, аудан активіне ризашылығын білдірді. Сондай-ақ ол әлі де заң мен тәртіп үстемдік орнайтын істердің бар екенін айтып, олардың да жемісті болатынына сенім білдірді.
– Қоштасу сәті келген соң атқарылған жұмыстарға қолғабыс еткен ауданның активіне ерекше алғысымды білдіргім келеді. Ауданға қарасты қала мен ауылдық округтердегі мәселелерді заң аясында шешуге тырыстық. Әлі де атқарылатын шаруа бар екенін жасырмаймын. Оны Айдос Тұрсынжанұлы сәтті жалғастырады деген сенімдемін. «Жасы кіші демеңіз, ақылы асса, аға ғой» демекші, маған қолдау білдіріп, көмектесіп, кез келген мәселені өз ауданымызда шешуге ықпал еткен аудан жұртшылығына алғысымды жеткіземін. Мен бұл ауданнан үлкен тәжірибе алдым. Бұл өлкенің өсіп-өркендеуіне тілектеспін, – деді Жәнібек Жақаев.
Ал ауданның жаңа прокуроры Айдос Тұрсынжанұлы заң аясында әділдік орнату тұрғысынан жұмыс одан әрі жалғасатынын айтып, аудан активімен, зиялы қауым өкілдерімен танысып, олармен бірлесе жұмыс атқаруға дайын екенін жеткізді.
Қос прокурордың қызметіне аудан жұртшылығы атынан ақ тілектер де айтылды. Қоғамдық кеңестің төрағасы Жанат Исағұлов өз сөзінде Жәнібек Жақаевтың атқарған жұмысына жақсы баға беріп, жаңа прокурор Айдос Шормановқа сәттілік тіледі. Сондай-ақ аудандық ардагерлер ұйымының төрағасы Сағат Мәсімақынов екі азаматқа батасын беріп, қызметтерін абыройлы болуын тіледі.
Айта кетейік, Жәнібек Жақаев 1984 жылы Алматы облысы Талғар қаласында дүниеге келген. Еңбек жолын 2007 жылы Алматы қаласының Медеу ауданында бастаған. Одан кейін Алматы қаласының және Алматы облысы прокуратурасында түрлі лауазымда еңбек етті.
Ал ауданның жаңа прокуроры Айдос Шорманов – Алматы қаласының тумасы. 1978 жылы өмірге келген. 2000 жылдан бастап Алматы қаласы, Павлодар және Алматы облыстарындағы заң қадағалаушы органдарында жауапты қызмет атқарған.

Дидар МӘЛІКҰЛЫ