Қаскелеңнің қоқысы қашан жиналады?

Соңғы уақытта Қаскелең қаласының кейбір көшесінде, көпқабатты үйлердің төңірегінде қоқыстың көптігі жиі байқалуда. Әсіресе, «Тазалық» компаниясы қызмет көрсететін аумақтарда күл-қоқыстың жиналмауы еріксіз көзге түседі.
Тұрғындарды алаңдатқан бұл жайттың мән-жайын білу үшін Қарасай аудандық әкімдікке арнайы барып, осы мәселеге қатысты Қарасай аудандық тұрғын үй коммуналдық шаруашылығы және тұрғын үй инспекциясы бөлімінен ресми жауап алуға тырыстық. Аталмыш мекеменің бас маманы Бекзат Кәрімовтің сөзіне сүйенсек, қалалықтардың наразалығы орынды және бұл мәселе осы айдың соңына дейін шешімін таппақ.

«Былтыр Қаскелең қаласының аумағында қатты тұрмыстық қалдықтарды жинауды және тасымалдауды жүзеге асыратын компаниялар арасында тендер ойнатқан болатынбыз. Нәтижесінде үш аумаққа жауапты үш компания анықталып, өз жұмыстарын атқаруға кіріскен еді. Алайда соның ішінде «Тазалық» атты мекеме соңғы уақытта өздеріне жүктелген міндетті дұрыс атқармағандықтан, олармен біржақты келісімшартты бұзуға мәжбүр болдық. Осыған байланысты аталмыш мекеменің жауапты аумағына қайтадан конкурс жарияладық. Ол жайында ақпарат аудандық «Naqty» газетінде және аудандық әкімдіктің ресми сайтында хабарланды. Қазіргі уақытта конкурсқа қатысуға ниетті мекемелердің өтінімдері біздің бөлімде қабылдануда», – деп түсіндірді аудандық әкімдіктің өкілі.
Осы ретте «Тазалық» компаниясының жұмысын уақытша кім атқармақ?» деген орынды сұрақ туындайтыны анық. Бекзат Кәрімовтің сөзінше, конкурс нәтижесі белгілі болғанша, бұл міндет «ЖАДЕ» компаниясына жүктеледі және ол тұрғындардың бұрынғы мекемеге төлеген төлемақысы есебінен тегін қызмет көрсетеді. Айта кетейік, бұл компания Қаскелеңнің басқа бір бөлігін күл-қоқыстан тазартушылардың бірі болып табылады.
Ресми мәлімдемеге сүйенсек, конкурс нәтижесі тендерлік құжаттамаға сәйкес ағымдағы жылдың 27 маусымында комиссия отырысында белгілі болады. Одан кейін үш жұмыс күні ішінде конкурсты ұтқан мекемемен келісімшарт жасалады.

Дидар МӘЛІКҰЛЫ