Қаскелең қаласына бір қарағанда ештеңе өзгермеген сияқты. Бірақ салыстырмалы түрде аудан орталығындағы әлеуметтік мәселелер шешімін тауып келеді. Газетіміздің осы санында Қаскелең қаласында бір жыл ішінде не өзгергенін назарларыңызға ұсынуды ұйғардық.
Қалалық әкімдіктің берген мәліметіне сүйенсек, жыл басынан бері 10 көше асфальтталып, қолданысқа берілген. Атап айтар болсақ, Еңбекші, Құрманғазы, Алматы, Байтұрсынов, Қайназар, Өркен, Тілендиев, Бәрібаев, Молдағұлова, Бокина көшелерінде жөндеу жұмыстары аяқталған. Бұл құрылысқа «ДРСУ-8» ЖШС-гі жауапты болып, үш техникасын жұмылдырды Осылайша аталған елдімекенде байыпты бастамалар жолға қойылып, тыңғылықты істер жалғасын тауып келеді. «Жол қадірін жүрген біледі» демекші, ауданымыздың өзге елді мекендеріндегі сияқты орталықтағы көшелерде асфальттың жоқтығы жыл сайын көтерілетін өзекті мәселенің бірі болып отыр. Сондықтан биылғы жылы аудан әкімінің тапсырмасымен жолдардың басым бөлігі ретке келтірілуде. Әл-Фараби, Тастақ, Бакинская көшелеріндегі жөндеу жұмыстары бітуге жақын екен. Ал Мәметова, Бастау, Бұлғақбаев, Тұяқбаев көшелерінде ретке келтіру үшін қаржы бөлінген. Реттілік бойынша жөндеу жұмыстары енді басталғандықтан, биыл, үлгермесе, ауысым тәртібімен келер жылдың басында қолданысқа берілмек. Мұндай жүйелі жұмыстар келесі жылы да жалғасын таппақ. Мәселен, Қойтас, Үлкенсаз, Ақсай, Ақши, Қасқасу, Суықбұлақ, Құлынды, Бөктер көшелерінде жөндеу жұмыстарын жүргізу жоспарланып отыр.
Ауданымыздағы үшаусымды мектеп мәселесі әлі өзекті. Қаскелең қаласында осы бағытта да тұрғындарды қуантар жағымды жаңалықтар жетерлік. Мәселен, ағымдағы оқу жылында «Қарлығаш» ықшам ауданында жанында орналасқан мектеп-гимназиясы қолданысқа берілді. Үш қабаттан тұратын бұл нысан 1500 балаға арналған. Кіші және үлкен спортзалдары бар. Асханасы 270 адамға арналған. Мектеп бірнеше қабатты болғандықтан, мұнда лифт те жұмыс істейді. Озық үлгіде бой көтерген гимназияда оқушылардың жан-жақты білім алуына барлық жағдай жасалған. Атап айтқанда, кабинеттердің әрбірінде интерактивті тақта мен мұғалімдер үшін жеке компьютер, басып шығарғыш құрылғысы орнатылған. Ал оқушылар өнерге деген қабілетін шыңдау үшін арт кабинеттерінде шұғылдана алады. Аталған мектептің ғимаратын мердігер «BI GLOBAL» компаниясы салған. Дәл осы мердігер мекеменің жетекшілік етуімен аудан орталығында тағы да бір мектеп бой көтермек. SDU университетіне қарама-қарсы аймақта орналасқан мектеп құрылысы биыл мамыр айында басталып, келесі жылы жетоқсан айында аяқтау жоспарланған. Аталған білім мекемесі «Жайлы мектеп» ұлттық жобасы аясында «Самұрық қазына» акционерлік қорының тапсырыс беруімен салынуда. 1500 балаға арналған мектеп 3 га. жерді қамтитын болады.
Қаскелеңде жол жөндеумен қоса қаланың дамуы мен көркеюі бағытында құрылыс жұмыстары қарқынды жүріп жатқанын айта кетуіміз керек. Төле би көшесінің бойында орналасқан көпқабатты тұрғын үйлердің аулаларына абаттандыру жұмыстары жүргізілген. Нәтижесінде аталған көшелерде балалар ойын алаңы, баскетбол алаңы және аулаларға асфальт төселді, тіпті, тұрғындар демалып жүруіне арналған шағын аллеяға айналды.
Бұрым ОРЫНБАСАР.