Қарасайлық жастар ашық аспан астында «Заманback» туындысын тамашалады

Жастар арасында ашық аспан астында жаңадан шыққан кинофильмді елмен қатар көру сәнге айналғалы біршама уақыт болды. Өздері секілді жастармен қызықты әңгіме, үлкен экран, керемет дауыс және дәмі көпке дейін естен кетпес попкорн оларға тамаша көңіл-күй сыйлайтыны анық.

Сондай қызықты кино көрсетілімнің бірі аптаның сәрсенбісі күні аудандық Жастар ресурстық орталығының ұйымдастыруымен Ұмтыл ауылдық округінің әкімі Ислам Ибатжанның қолдауымен Жалпақсай ауылында өтті. Оның барысында аудан жастары мен округ тұрғындары футбол алаңында жиналып, танымал Роберт Земекистің «Назад в будущее» фильмінен шабыт алған Дархан Сәркеновтың «Заманback» комедиясын тамашалады.

Қарасай ауданының жастар ресурстық орталығының жетекшісі Жарқынай Садуованың айтуынша, аталған шара отандық фильмдер көрсетілімін іске асыруды, жастардың бос уақытын тиімді пайдалануға, ауызбіршілікке шақыруға бағытталған.

Кеште алдымен жиналған көрермендер үшін мерекелік көңіл-күйді ауданның шығармашылық ұжымдарының қойылымдарымен алдын ала бағдарлама жасалды. Қатысушылар жергілікті әртістердің орындауындағы әндер мен билерді қамтитын концерттік нөмірлерді тамашалады.

Мұнан кейін сахна төріне Алматы облысының Жастар ресурстық орталығының жастар бастамаларын дамыту және волонтерлікті қолдау бөлімінің басшысы Акежан Қабдолдаев пен Ұмтыл ауылдық округінің әкімі Ислам Бауыржанұлы шығып, жиналғандарға жақсы көңіл-күй сыйлап, осындай елдің көңілін көтеретін шаралар алдағы уақытта ұйымдастырылатынын жеткізді.

Ашық аспан астында өткен кино көрсетілімнің ең қызықты сәті арнайы шақырылған Еламан Есентаев, Жақсылық Айтқұрман, Жасұлан Айтен, Мұрат Амантай секілді танымал тұлғалар болды. Еліміздің белгілі әртістері жиналғандарға алдымен келгендері үшін алғыстарын айтып,  көрермендерге «Заманback» фильмнің мән-мағынасын түсіндірді.

Мұнан кейін бәрі қазақстандық кинотеатрларда толық аншлагпен көрсетілген «Заманback» фильмін тамашалады. 90 жылдарға түсіп, әке-шешесінің тағдырын өзгерткісі келген жас азамат туралы туынды көптің көңілінен шықты. Көрсетілім соңында көрермендер өз бағасын беріп, фильмнің қызық өткендігі жайлы айтып, ризашылықтарын білдірді.

Ашық ауада жайлы орта, жылы ауа райы және жиналу мүмкіндігі бұл кино кешін барлық қатысушылар үшін ұмытылмас етті. Сондықтан жастардың рухани және шығармашылық дамуына бағытталған шара соңында үлкен-кіші аудан тұрғындары жақсы көңіл-күймен тарқады.

Ақтоты МЫРЗАБЕКҚЫЗЫ.