Алпыстың асқарына жеткен ардақты азамат

Қасиетті Қарасай жерінің өсіп-өркендеуі жолында еңбегін елге арнаған азаматтар аз емес. Әрбірі – әр саланың тұтқасын ұстап, кейінгі ұрпаққа өнегелі істерімен үлгі болып, халық алдында сый-құрметке бөленіп жүрген жақсы жандар. Солардың арасында есімін ерекшелеп айтатын, қайсар мінезді, жарқын жүзді, Қарасай ауданының Құрметті азаматы Сәкен Шаймолдаевты айрықша атап өтуге болады.
Ұзақ жылдар бойы құқық қорғау жүйесінде табандылық танытқан арда азамат жақында асқаралы алпыс жастың асуына шалдықпай, шаршамай жетіп отыр. Азаматтық келбетін сипаттайтын оның еңбекқорлығы, өз ісіне деген жауапкершілігі, тиянақтылығы бір төбе. Сәкен ағамыз – осынау мерейлі жасқа дейін әрдайым абырой биігінен көрініп, қызметтік бағытында талай жетістікке жеткен азамат. Сондықтан оның өмір жолына көз тастап, азды-кем ой-өрбітіп, қалам тербесек артық болмас.

Сәкен Қырғызалыұлы 1965 жылдың 1 сәуірінде Алматы облысына қарасты Жамбыл ауданының Жаңгелді ауылында дүниеге келген. Қарапайым отбасында өскен бала 1982 жылы осы ауданның Рославль совхозында орта мектепті аяқтап, бір жыл қой бағып, ауылдағы әкесіне қолғабыс еткен. Одан кейін Кеңес әскерінің қатарында болып, Отан алдындағы борышын өтеуге Германия еліне аттанған. Мұнда екі жыл іс басқарушы ретінде әскери міндетін атқарып, 1985 жылы еліне оралды. Осы жылы Алматы қаласындағы Еңбек Қызыл Ту ордені ауылшаруашылығы институтының инженер-механик факультетіне оқуға түскен. Дәл осы оқу ордасында білім алып жүріп 1986 жылы Желтоқсан көтерілісіне қатысқан. Жастармен бірге елдің ертеңі үшін алаңдап, қайсар қыз-жігіттердің ортасынан табылып, белсенділік танытып жүргенде Кеңес әскерінің соққысына жығылған. Алайда ол рухын жоғалтпай, намысшыл қазақ жастарымен бірге мемлекеттің тәуелсіздігі үшін басын бәйгеге тікті.
Студент Сәкен оқу ордасында көшбасшылардың бірі ретінде қоғам белсендісі, Комсомол прожекторы болып, белсенді білімгерлердің қатарынан табылды. 1990 жылы «инженер-механик» мамандығының иесі атанды. Осы жылы жолдама арқылы Алматы облысының Кеген ауданындағы Тоғызбұлақ колхозында механик ретінде алғаш еңбек жолын бастады. Оның жұмысқа деген адалдығы, әрбір іске жауапкершілік танытуы басшылықтың сеніміне және жоғары бағасына ие болды. Осылайша гараж меңгерушісі, бас инженер сияқты жауапты міндеттерді орындап, қызметтерін абыроймен атқара білді.
Сәкен Қырғызалыұлының қызыққа әрі тосын оқиғаға толы, жемісті жетістікке ұласқан еңбек жолының біразы құқық қорғау саласында өтті. Техника маманы болғандықтан, бұл жауапты қызметті 1993 жылы ҚР Ішкі істер министрлігінің шақыртуымен Бас басқарма жол полициясының аға инспекторы ретінде бастады. 1997 жылы Алматы облысы Ішкі істер департаментінің жол полициясы басқармасының штабына бас маман болып орналасты. Сәкен Шаймолдаев осындай қырағылық жұмысты атқара жүріп, өз білімін жетілдіруді де ұмытқан жоқ. 2003 жылы Алматыдағы Абай атындағы Қазақ Ұлттық педагогикалық университетінің заң факультетін бітірді. Ал 2005 жылы Қарасай ауданының Ішкі істер басқармасының әкімшілік-тәжірибе бас маманы, одан кейін 2009 жылы Қарасай ауданының жол полициясының бастығы, 2013 жылы аталмыш органның қоғамдық тәртіп жөнінде бастықтың орынбасары қызметін атқарды.
Осындай түрлі басшылықта жұмыс істеген Сәкен Қырғызалыұлы әрдайым ерен еңбектің үлгісін көрсете білді. Оның Ішкі істер саласындағы қызметі ширек ғасырға жетіп, ол 2015 жылы еңбек өтілінің 25 жыл толуына байланысты құрметті демалысқа шықты.
Сәкен аға зейнеткер болса да осы уақытқа дейін аудан көлеміндегі қоғамдық жұмысқа белсене араласып, патриоттық және ұрпақ тәрбиесі бағытындағы түрлі іс-шарадан қол үзген емес. Әсіресе, ел Тәуелсіздігінің мерекесі аясында Желтоқсан ардагері ретінде мектеп, колледж, университет сияқты білім ошақтарындағы талай кездесулерде бой көрсетіп, жастарға ағалық ақылын, өсиеттерін айтып келеді.
Сәкен Қырғызалыұлының еңбегі ешқашан ескерусіз қалмаған. Құқық қорғау саласында атқарған қалтқысыз қызметі үшін «Ішкі істер органдарының үздігі» атанып, «ҚР Тәуелсіздігіне 25 және 30 жыл», «Желтоқсан ардагері», «Желтоқсан қаһарманы», «ҚР Патриоты», «Егемен ел Патриоты», «ҚР Полициясына 30 жыл» сияқты түрлі сипаттағы медальдардың иегері болды. Сондай-ақ Президенттің, ҚР Ішкі істер министрлігінің, Алматы облыстық Ішкі істер департаментінің, Қарасай аудандық Ішкі істер басқармасының, Алматы облысы әкімінің, Қарасай ауданы әкімінің және Алматы облыстық Азаматтық альянсы төрағасының Алғыс хаттарымен марапатталған. Сондай-ақ ерекше атап өтер тағы бір жетістігі әрі еңбегінің бағалануы – «Қазақстанның 100 жаңа есімі» жобасында есімінің енуі.
Тағы бір айта кетерлігі, ардақты азамат қызмет жолында Қарасай ауданының әлеуметтік-экономикалық дамуына сүбелі үлес қосып, өңірдің өсіп-өркендеуі үшін еңбегін аянып қалмады. Зейнет жасында болса да осы ауданның тыныс-тіршілігіне араласып келеді. Сәкен ағаның осынау ізгі қасиеттері аудан басшылығы тарапынан ескеріліп, оған 2020 жылы мәслихаттың шешімімен «Қарасай ауданының Құрметті азаматы» атағы берілді. Одан бөлек 2023 жылы «Bilim-Orkenieti» Ұлттық инновациялық ғылыми-зерттеу орталығының ұйымдастыруымен республикалық байқауда бағы жанып, «ҚР Құрметті азаматы» атағын жеңіп алды. Бұл да оның қызметінің жемісі әрі жеңісі деп білеміз.
Ғұмыр жолында өз саласында жетісттікке жетіп, мемлекеттің дамуына бір адамдай үлес қосып, патриоттық қасиетімен дараланған Сәкен ағаның сара жолы үлгі аларлықтай. Сондықтан ізгіліктің жолындағы ізгі істері жазба ретінде қалса артық болмас. Осы ретте Сәкен Қырғызалыұлының қаламынан туған патриоттық негізде жеке кітабы шыққанын айтуға болады. «Сәкеннің сара жолдары» деп аталатын рухани құндылықта оның өмір мен еңбек жолдары, қалтқысыз қызметіне қатысты айқын ақпараттар қамтылған.
Автордың кітабынан бөлек арнайы документалды фильм де жарық көрді. Бұл туынды арқылы Сәкен аға көпшілікке бейнематериалмен танылып, ғұмырнамасы мен қызметінен сыр шертеді.
Осындай жетістіктерімен дараланып, ел алғысына бөленіп жүрген Сәкен Шаймолдаев, міне енді 60 жастың асқарына шығып отыр. Өз ісіне деген адалдығы, азамат ретінде адамдығы, қайсар мінезді, өр рухты кісілік келбеті көпке үлгі десек, артық айтқандық болмас. Орнықты отбасының тірегіне айналған, достарымен сыйластығы жарасып, әріптестерінің арасында абыройы артқан Сәкен Қырғызалыұлына тек жақсылық тілейміз! Ғұмыры ғибратты, ұрпағымен қымбатты, ағалық ақылымен сымбатты болып, бақ-беделі арта берсін, демекпіз.

Дидар МӘЛІКҰЛЫ.