Алмалыбақтағы жаңа мектеп оқу жылына дайын

Президенттің пәрменімен жүзеге асып жатқан «Жайлы мектеп» ұлттық жобасы кейінгі кездері «Келешеке мектептері» деп аталып, жұмысын жүйелі тұрде жалғастырып келеді. Жобаның бұлай сөз түрінде өзгеруіне қатысты Оқу-ағарту министрі Ғани Бейсембаев мамыр айында, яғни оқу жылының аяқталу қарсаңында арнайы мәлімдеген еді. Айтуынша, әу баста ұлттық жобаның ең басты мақсаты үш ауысымдық пен апатты жағдайдағы мектептердің мәселесін шешу болатын. Сондықтан бұл құрылыс жобасы ретінде «Жайлы мектеп» болып аталған. Енді жайлы орта қалыптасқан соң, «Жайлы мектеп» идеясынан «Келешек мектептері» идеясына көшу жоспарланыпты.
Атаулары басқа болғанымен, республика көлемінде нәтижелі болып жатқан ұлттық жобаның мақсаты да, міндеті де – бір. Оның шапағатын көрушілердің қатарында Қарасай ауданы да бар. Мәселен, осы уақытқа дейін алты мектеп ел игілігіне берілді. Енді екеуі биылға жоспарлануда. Олар –Алмалыбақ пен Бұлақты ауылдарындағы жаңа білім ошақтары.

Ал осы аптада Ұмтыл ауылдық округіне қарасты Алмалыбақтағы мектептің жай-күйімен танысудың сәті түсті. 1500 оқушыға арналған ғимарат заманауи талапта әрі отандық жиһаздармен жабдықталған.
Бұл назардағы нысан 3 га жер телімінде орналасқан. Мектептің тапсырыс берушісі «Samruk-Kazyna Construction» АҚ болса, құрылысын жүргізген компания – «BI Group» ЖШС.
Бүгінгі таңда білім мекемесі қолданысқа берілуге дайын. Айналасы абаттандырылып, әкімдіктің ықпалымен жолдары асфальтталып, жарықшамдары орнатылған.
Мектептің сипатына тоқталар болсақ, жаңа ғимарат болған соң, әрине, өзіндік ерекшеліктері бар. Бұл жайында «BI Group» компаниясының сайт менеджері Асан Бекасылов кеңінен айтып берді. Оның айтуынша, жоғары және кіші сыныптар үшін жеке спортзалдар қарастырылған, олардың жалпы саны – төрт. Асханасы да оқушылардың жас ерекшеліктеріне қарай жасалған. Одан бөлек ауласында үлкен стадион мен балаларға арналған ойын алаңы бар. Актзалы 324 адамға арналған, мұнда арнайы LED-экран орнатылған.
Сонымен қатар, әр пәннің кабинеттері толығымен керек-жарақтармен, жиһазбен және физика, химия пәнінің зертханалары тиісті құрал-жабдықтармен жабдықталған. Ал STEM бөлмесінде оқушылар үшін VR көзілдірігімен, дронмен жұмыс істеу және робототехникамен айналысу мүмкіндігі қарастырылған.
Мектептің тағы бір ерекше тұсы – кіреберісте орнатылған Face ID жүйесі. Ол арқылы оқушының келіп-кеткені қадағаланады. Сондай-ақ бұл ғимаратта ұлттық нақышта әсемделген, жиһаздармен сәні келіскен реакрация аумағы бар. Бұл жерде оқушылар үзіліс кезінде демалып, емін-еркін әңгімелесіп, бос уақыттарын тиімді өткізе алады.
Үш қабатты білім шаңырағы, жалпы айтқанда, жаңа оқу жылына сақадай-сай дайын. Қазіргі уақытта жаңа оқу жылына дайындық жұмыстары пысықталып, оқушылардың құжаттары қабылдануда.

Дидар МӘЛІКҰЛЫ