Алатау лигасы – шеберлік шыңдаудың жолы

Жастар арасындағы бұқаралық спортты дамыту өскелең ұрпақтың дені сау болуын қалыптастаруға үлес қосады. Бұл ретте түрлі бағытты жүйелі жұмыстар атқарылып жатқанын ескерсек, соның ішінде Алматы облысында қолға алынған «ALATAU LIGA-2025» спорттық жобасын ерекше атап өтуге болады. Оның облыс көлеміндегі салтанатты түрде ашылуы осы аптада Шамалған ауылындағы «Үшқоңыр» балалар мен жасөспірімдер мектебінің базасында өтті.
Шараға Алматы облысы әкімінің орынбасары Болат Күренбеков, Қонаев және Алатау қалаларынан, сондай-ақ облыстың 9 ауданынан 11 команданың өкілдері қатысты. Бұл спорттық басқосудың өтуіне Алматы облыстық дене шынықтыру және спорт басқармасы ұйытқы болды.

Шарада алдымен облыс әкімінің орынбасары Болат Қайратұлы қонақтар мен жарыс қатысушыларын жобаның бастау алуымен құттықтап, бұл игі шара өткен жылдың 15 наурызында басталғанын тілге тиек етті.
Аталған жоба бұқаралық спортты, оның ішінде жастар арасындағы спортты дамытуға бағытталған. Өткен жылы оның аясында 140 спорт клубы ашылды. Нәтижесінде 13 500 адам дене шынықтырумен және спортпен жүйелі түрде айналыса алды, ал оған тартылған халықтың үлесі 39%-дан 41,4%-ға дейін өсті.
Спорттық шараның ашылу салтанатында каратэ мен футболды серік еткен жас өрендер ерекше қойылым ұсынып, түрлі шеберлік әдіс-тәсілдерді көрсетті. Сондай-ақ рәсім соңында көптеген спортшыға доптар сый ретінде табыс етілді.
«Алатау лигасы» жобасының бастамашылары бұл қадам бекер емес екенін және ғұмыры ұзақ болатынына сенім білдірді. Айтуларынша, аталған жоба спортқа қызығатындарды бір күндік шұғылдануға шақыруды мақсат етпейді, әрдайым болашақ ұрпақты саламатты болуға үндейді.
Ал Алматы облыстық дене шынықтыру және спорт басқармасы басшысының міндетін атқарушы Рахман Шахарбектің айтуынша, «Алатау лигасы» спорттық жобасын іске асыру 10 000-нан астам халықты танымал бұқаралық спорт түрлерімен қамтуға мүмкіндік береді. Оның үстіне, ауылдық жерлерде бұл өте маңызды. «Алатау лигасы» жобасының аудандық және облыстық деңгейлеріндегі жарыстарға 16-23 жас аралығындағы ойыншылар қатыспақ. Олар шынығып, шеберліктерін шыңдағаннан кейін футбол, баскетбол, волейбол және үстел теннисі сияқты спорт түрлері бойынша кәсіби клубтарда ойнай алады.
– Жалпы, өңірде спортқа қолжетімділікті қамтамасыз ету бойынша үлкен жұмыс атқарылуда. Мысалы, өткен жылы Еңбекшіқазақ және Райымбек аудандарында жаңа кешендер ашылды. Сонымен қатар облыс бойынша 1800-ден астам спорт нысандары жұмыс істеуде, – деді сөз соңында Рахман Шахарбек.
Айта кетейік, жоба аясында спорттың төрт түрі – футбол, волейбол, баскетбол және қазақ күресі бойынша сайыстар ұйымдас-тырылады. Биылғы жылы жарыс бағдарламасына үстел теннисі де енгізілді. Қатысушы-лардың жасы 16 жастан жоғары болуы тиіс.
«ALATAU LIGA-2025» спорттық жобасының бірінші кезеңі 15 сәуірде облыстың әр ауданының ауылдық округтерінде басталды. Ол 15 мамырға дейін жалғасады. Оның жеңімпаздары мен жүлдегерлері екінші кезеңге – 20 тамыздан 20 қыркүйекке дейін қатысады. Сонымен, үшінші финалдық кезең 10 қазаннан 25 қазанға дейін өтеді.
Барлық төрт спорт түріндегі үздік командалар кубоктармен, медальдармен, Құрмет грамоталарымен және қомақты ақшалай сыйлықтармен марапатталады. Жалпы жүлде қоры 16 000 000 теңгені құрап отыр.
Дидар МӘЛІКҰЛЫ.
Суретті түсірген Ақтоты МЫРЗАБЕКҚЫЗЫ.