Ауданымыздағы Сүлеймен Демирел университетін осы уақытқа дейін 5000-нан астам түлек бітіріпті. Көбі қазіргі таңда отандық және әлемдік еңбек нарығында табысты қызмет атқаруда, олар квазимемлекеттік және корпоративтік секторларда сұранысқа ие. Үкіметте басшылық лауазымдарда қызмет істеп жүргендері бар, сондай-ақ, кейбіреулері белді кәсіп иелері болып табылады. Түлектер қауымдастығын біріктіріп, әрі оқу орнының беделін нығайту мақсатында университет «SDU connect» мобильді қосымшасын іске қосты. Бұл қосымшаны аталмыш жоғарғы оқу орында бітіріп, қазіргі таңда IT саласында еңбектеніп жүрген мамандар университет әкімшілігінің қолдауымен жасап шығарған. «SDU connect» қосымшасы арқылы ақпарат берудің жаңа форматы түлектердің қарым-қатынасын қолжетімді және өнімді етеді. СДУ президенті Мейірбек Мажитовтың айтуынша бұл бағдарлама түлектер мен университет арасындағы ең ірі байланыс алаңына айналары сөзсіз.
– Түлектермен, қауымдас-тықтармен және клубтармен белсенді қарым-қатынас бұрыннан бері әлемнің көптеген жоғары оқу орындарында әдеттегі тәжірибеге айнаған. Әлемнің 100 үздік университеті өз түлектерінің қолдауының арқасында табысты қызмет атқарады. Өз кезегінде СДУ-да осы әлемдік тәжірибені енгізуде. Себебі, түлектеріміз – біздің зор мүмкіндігіміз бен активіміз. Сондықтан да біз білім ордасының жетістіктері мен дамуына өз үлесін қосуға ниет білдірген түлектер үшін әрі өз студенттеріміз үшін де аталмыш мобильді қосымшаны іске қостық, – дейді ол.
Студенттер аталмыш қосымшаны жүктеп, онда өздері туралы аты-жөні, жоғарғы оқу орнын бітірген жылы, мамандығы, жұмыс орны, өз компаниясының жұмыс ерекшелігі сияқты ақпаратты қалдыра алады. Бұл қауымдастық мүшелері арасындағы өнімді іскерлік байланысқа және пайдалы ақпарат алмасуға кең мүмкіндік береді. Мәселен, қосымшаны пайдаланушы құрылыс компаниясында жұмыс істеп, оған жақын арада қызметкерлер қажет болған жағдайда, ол бағдарламаның ішіндегі қызмет арқылы өзіне керек саладағы адамдармен тез арада тікелей байланысқа шыға алады. Сонымен қатар, осы платформаны оқып жүрген немесе оқуды бітірген студенттер қолданып, бос жұмыс орындары туралы ақпарат алып, жұмыс іздей алады. Сондай-ақ, олар басқа қалада тұратын студенттер арқылы шұғыл құжаттар немесе сәлемдемелер беріп жіберуге мүмкіндік туады. Мұнан бөлек, өзара тиімді ынтымақтастық үшін мобильді қосымшаны түлектердің таныстары, достарымен қатар, ірі компаниялар да жүктей алады, бұл тәсіл іскерлік байланыстар желісін бірнеше есе арттыруға мүмкіндік береді. Қосымшаның тағы бір маңызды мақсаты – қаржылай көмек көсету, қайырымдылық пен демеушілік арқылы фандрайзингті дамыту. Қызығушылық танытқан түлектер қосымшаның әртүрлі бөлімдерінен стартаптар, білім беру жобаларын, мұқтаж жандарға көмек көрсету сияқты қажетті ақпаратты таба алады. Аталмыш қаржылық көмектің барлық процедурасын олар онлайн режимінде қадағалай алады. Бұл қосымшаны iOS және Android операциондық жүйелері арқылы жүктеп алуға болады.
Ақтоты МЫРЗАБЕКҚЫЗЫ.