Ауданымыздың мәдениет саласының дамуына және жас дарынды жеткіншектердің бойындағы қабілеттерін жетілдіріп, үлкен өнер тұғырына шығуға атсалысып жүрген «Қалбибі» өнер студиясының шәкірттері тағы да жеңіс тұғырынан көрінді.
Жуырда, яғни, 3-8 мамыр аралығында Өзбекстан Республикасының астанасы Ташкент қаласында «Шығыс раушаны» атты балалар және жастар шығармашылығына арналған II халықаралық байқау өткен болатын. Балалар мен жастардың шығармашылық әлеуетін ашып, шығармашылық қызметтің әртүрлі бағыттары насихаттау, жеке орындаушылардың кәсіби деңгейін көтеру, дарынды және жарқын орындаушыларды анықтау үшін ұйымдастырылған байқауға биыл Өзбекстан, Болгария, Қазақстан, Қырғызстан, Үндістан, Әзербайжан, Тәжікстан және де Ресей сияқты мемлекеттерден әншілер мен шығармашылық топтар қатынасты. Осындай үлкен байқауға тас-түйін дайындықпен барған жерлестеріміз де сынға түсіп, өз шеберліктерін дәлелдеп жүлделі орындармен оралды.
Атап айтқанда, қазақтың әні «Молдабай» мен француздың әні «Пардона муаны» орындаған ауданымыздың жас әрі талантты әншісі, бірнеше рет республикалық және де халықаралық байқаулардың жеңімпазы, аталмыш вокалдық студияның шәкірті Нұрлыбек Сапарбай бас жүлде – Гран-приді иеленді. Ал, Ыбырайдың әні «Гәккуді» орындаған Ғаламат Жұмабай жүлделі үшінші орынды алды. «Шығыс раушаны» байқауының лауреаттары атанған Нұрлыбек пен Ғаламат Болгария мен Қырғызстанда вокалдан өтетін халықаралық дәрежедегі байқауға жолдама алды. Сондай-ақ, дарынды балаларға арналған осы байқауға «Қалбибі» өнер студиясы атынан барған Нұрасыл Ермек, Бекзат Есберген, Аружан Ермек, Сағымбай Камила мен Арыстар Серікхан бірінші дәрежелі дипломдармен марапатталды. Осылайша қарасайлық жас өнерпаздар шет елде өз өнерлерін көрсетіп, ауданымыздың абыройын тағы бір асқақтатып келді.
Жас өнерпаздарымыз 1 маусымда орталық стадионда өтетін концертте қызыл кілемнің үстінен жүріп өтетін болады. Сонымен қатар, дәл осы күні Алматы қаласындағы «Алатау» дәстүрлі театрында Түркия мемлекетінде өтетін байқауға арналған гала концертке қатысатын болады.
Аудан орталығында орналасқан, білікті ұстаз Қалбибі Абдуллаева басқаратын балалар мен жасөспірімдер шығармашылығы орталығының шәкірттерін жеңістерімен шын жүректен құттықтаймыз!
Ақтоты МЫРЗАБЕКҚЫЗЫ.