Елбасымыз Н.Назарбаевтың «Болашаққа бағдар: рухани жаңғыру» мақаласы жарияланғалы бері бағдарламалық ұлттық рухты ұлықтайтын үлкен жобалар, әрі оның аясында елімізде көптеген игі шаралар атқарылуда. Соның бірі ретінде ағымдағы жылдың қараша айының екінші жұлдызында, Қарасай аудандық тарихи-өлкетану музейінің қызметкерлері ұйымдастырған, Үшқоңыр су шарушылығы колледжі студенттерінің ақындармен болған кездесуін айтса болады.
Шараға музей директоры, ақын, Қазақстан жазушылар одағының мүшесі Серік Қалиев пен айтыскер ақын, «Дарын» сыйлығының лауреаты Сырым Әуезхан шақырылды. Кеш барысында музей директоры Серік Қалиев Елбасы мақаласына кеңінен тоқталып, жастарды қоғамның саналы азаматы, намысы жоғары, рухы биік жеке тұлға болуға шақырды.
Сонымен қатар, өз шығармашылығынан рухты көтеретін патриоттық өлең-жырлар оқыды. Аудан тарихына байланысты шығарған бейнероликтер көрсетіліп, Сырым Әуезхан өзімен қатарлас жастар арасында ашық ой үстінде әңгіме өрбітті. Жалпы айтқанда, аламан айтыстың жалынды жұлдызы ұлттық құндылыққа, мәдениетімізге, салт-дәстүрімізге қатысты айшықты ойларын ортаға салды. Тыңдаушылыр тарапынан қос ақынға сан сауалдар қойылып, қызу пікір алмасулар болып жатты.
Көңілді кештің соңы айтыскер азаматтармен естелік суретке түсумен және бұқаралық ақпарат құралдарына сұхбат берумен жалғасты. Осындай кездесулер алдағы уақытта да ауылдық округтерде жалғасын табатын болады. Сондай-ақ, осы рухани кездесуді ұйымдастырған колледж директорының тәрбие ісі жөніндегі орынбасары Лиясова Гүлмира Жайлаубекқызына өз алғысымызды білдіреміз.
Рыскүл АБДИКАИМОВА,
Қарасай аудандық тарихи-өлкетану музейінің
экскурсия жүргізушісі.