Ғасыр жасындағы аналарды құттықтады

Қазақта үлкенді сыйлап, қарияға құрмет көрсету қанымызға сіңген қасиет болса, асыл аналарымызды ардақтау ол бөлек әңгіме. Тіршіліктің тірегіне айналған ақылшы апаларымыздың өнегелі өмірі қашанда ұрпаққа үлгі. Сондай аяулы жандардың біразы, оның ішінде ғұмыр жолы ғасырлық уақытқа татитын қазыналы қарттарымыздың ауданымызда тұрып жатқаны біз үшін мақтаныш. Өткен аптада біз тілге тиек еткен кейуаналарымыз Халықаралық әйелдер күніне орай, ерекше құрметке бөленді. Мереке қарсаңында Алматы облысының әкімі Марат Сұлтанғазиев пен аудан басшысы Жасұлан Естенов қадірлі аналарды құттықтады.

Алдымен олар Абай ауылында тұратын 97 жастағы Жұмакүл Мұратқызының шаңырағына қонаққа барып, ізгі ілтипаттарын білдірді. Жұмакүл апамыз – ислам дінін дәріптеуші, ерен еңбегі бар хафиздердің бірі. Қасиетті Құран кітабын толық жаттаған, әлі күнге дейін жадында сақтаған қарияның бұл ерекше қасиетін облыс басшысы Марат Елеусізұлы айрықша атап өтті. Сондай-ақ өңір басшысы ақ жаулықты ананың ұзақ ғұмырын, рухани жолдағы еңбегін жоғары бағалап, құрмет көрсетті.
«Сіз – асыл дініміздің қағидаларын ұстанып, өскелең ұрпаққа имандылық пен рухани құндылықтарды насихаттаушы тұлғасыз. Сіздің өмір жолыңыз – ұрпаққа үлгі, ұлағатты өнеге», – деді облыс әкімі әңгіме барысында. Ал Жұмакүл әже аймақ басшысына алғысын білдіріп, аналық ақ батасын берді.
Қари атанған қарияның қасиетті Құран Кәрімді жан-тәнімен үйренуіне өзі өмір сүрген ортасы ықпал еткен. Оның ата-бабалары Қазақстанның Қызылорда облысынан болса да, кезінде Ауғанстанға кетуге мәжбүр болған. Сол жерде Жұмакүл апа дүниеге келген. Одан кейін Сауд Арабиясының Мәдина қаласына көшіп келіп, онда 30 жыл өмір сүріп, дінге қатысты түрлі бұйымдар жасап, оны сатумен қатар, Құран оқумен айналысқан. Алла Тағала оған үш перзент сүюді нәсіп еткен. Өкінішке орай, балаларының екеуі өмірден ерте өткен. Бүгінгі таңда 15 немеренің сүйікті әжесі. Жұмакүл апа сонау 1998 жылы жалғыз ұлымен бірге тарихи Отаны – Қазақстанға қоныс аударған.
Ғасыр жасқа таяған кейуана қазіргі уақытта шәкірті Құралай Пернебайқызымен бірге Абай ауылында тұрады, сонымен қатар «Ұлт анасы» қоғамдық қорының қамқорлығында. Бір қызығы, Жұмакүл әженің есте сақтауы өте жақсы, қабілеттері ерекше. Ол Құранды жатқа біліп қана қоймайды, сонымен қатар парсы, араб, түрік және ағылшын тілдерін меңгерген.
Әкімдер құрмет көрсету үшін арнайы атбасын бұрған келесі қария – Қаскелең қаласының тұрғыны, зейнеткер Сәлима Бұлғақбаева. 15 наурыз күні 100 жасқа толатын ақжаулықты әжемізге облыс басшысы Марат Елеусізұлы ыстық ықыласын білдіріп, өмірлік тәжірибесін ерекше атап өтті.
«Сіз сияқты жандар – қазақ отбасының алтын қазығы, ұрпақтың тәрбиешісі. Еңбегіңіз бен өмірлік тәжірибеңіз – біз үшін баға жетпес қазына», – деді өңір басшысы. Мұндай ізгі ілтипатқа Сәлима Тілеубайқызы шынайы ризашылығын білдіріп, азаматтарға ақ тілегін арнады.
Айта кету керек, Сәлима апаның өмірлік жары Ақылбай Бұлғақбаев Ұлы Отан соғысына қатысқан. Бүгінгі таңда Қаскелең қаласында көшенің бірі майдангердің есімімен аталады. Бір айрықша атап өтерлігі, Ақылбай Бұлғақбаев 14 жыл бойы Қаскелең қаласын басқарған. Оның басшылық тұсында Қаскелең ауылына қала мәртебесі берілген. 2001 жылы 87 жасында дүниеден өтті.
Ал Сәлима Тілеубайқызы жайлы айтар болсақ, ол сонау 1925 жылы Солтүстік Қазақстан облысы Рузаев ауданы Мұқыр ауылында дүниеге келген. Белгілі себептерге байланысты оның балалық шағы Өзбекстанның Ферғана алқабында өтті. Кейін отбасымен бірге Алматыға, одан кейін 72 жыл тұрып жатқан Қаскелеңге келді.
Сәлима Бұлғақбаева соғыс кезінде Алматыға эвакуацияланған Мәскеу мемлекеттік университетінің шет тілдері факультетінде оқыған. Содан бұл оқу орны Мәскеуге қайта оралғанда Қыздар педагогикалық институтын «ағылшын тілі пәнінің мұғалімі» мамандығын бітірді. Ал ұстаздық жолын ширек ғасыр бойы еңбек еткен М.Горький атындағы (қазіргі Қ.Сәтбаев) орта мектептен бастап, аталмыш білім ошағынан зейнетке шықты. Сәлима апаның жалпы педагогикалық тәжірибесі 40 жылдан астам.
Сәлима апа бүгінде отбасы мен достарының қамқорлығына бөленіп, өмірінің жүзінші көктемін тойлауда. Бес ұлының ардақты анасы атанып, немере, шөбере, шөпшек сүйіп отырған асыл әже.
Дидар МӘЛІКҰЛЫ.