Осыдан бір апта бұрын әзілкеш жастар арасында «Жайдарлы JAIDARMAN» ойыны өтіп, Қарасай ауданы әкімінің кубогі сарапқа салынды. Алматы облысының жастар ресурстық орталығы қолдау білдірген бұл шараға қарасайлық өнерлі жастар белсенділік танытты. Олар аудандық Мәдениет үйінің сахнасында бас қосып, қағытпа қалжындарымен көрермен қауымға көтеріңкі көңіл-күй сыйлады.
Жайдарман ойынын өткізуге Қарасай аудандық жастар ресурстық орталығы ұйытқы болып, аудан бойынша мектеп оқушыларынан, колледж студенттерінен және басқа да белсенді жастардан құралған командалардың сахнада өнер көрсетуіне ықпал етті.
12 топ болып астарлы әзілдерімен күлкі сыйлаған жастардың өнеріне Алматы облысының жастар ресурстық орталығының ұйымдастыру бөлімінің басшысы Еламан Төлепберген, «Үшқоңыр» КТА командасының капитаны Сакен Сариев және «Қарасай Жастар» театрының жетекшісі Сержан Елікбай қазылық етті. Олар жайдарманшылардың сахнадағы жүріс-тұрысын, орамды ойларын, шығармашылық қабілеттерін бағалап, сын тұрғысынан да пікірлерін білдірді.
Сонымен қазылар алқасының шешімімен және көрерменнің шынайы қошеметіне ие болған командалар өз дәрежесінде лайықты орындарын иеленді. Атап айтқанда, Қ.Қошмамбетов атындағы орта мектептің «Әнастасия» командасы І орынға лайық деп танылды. Олар Алматы облысы әкімінің кубогі ойнатылатын жайдарман ойынына жолдама алып, 80 мың теңгелік қаржылай сертификатқа ие болды. Сондай-ақ Жамбыл №2 орта мектебінен «Потолок» ІІ орын алса, үздік үштіктен Қаскелең қаласының жастарынан жасақталған «КазГаса» көрінді. Сәйкесінше екі команда 50 мың және 30 мың теңгелік ақшалай жүлдені бөліп алды. Одан бөлек, Қарасай ауданының мәслихат депутаты Бекжан Сүнбековтің демеушілігімен командалардың екі белсенді ойыншысына қаржылай сыйлық берілді.
Жоғарыда аталған жеңімпаз командаларды осы кештің құрметті қонағы болған Қарасай ауданы әкімінің орынбасары Рустам Атшабаров, Алматы облысының жастар ресурстық орталығының директоры Мақсат Кенешев және осы орталықтың бөлім басшысы Талант Ахметов арнайы құттықтап, сый-сияпаттар мен жеңіске жеткен топқа Қарасай ауданы әкімінің кубогін табыс етті.
Өз тілшіміз.