Кеген аудандық мәдениет үйінің режиссері, талантты ақын, танымал өнер иесі Аршын Нұрбақыт үшін биылғы жыл да сәтімен басталып отыр. Ол наурыз мерекесі қарсаңында Қазақстан Жазушылар Одағы Басқармасы мен «Таңжарық зерттеу қоғамдық қоры» ұйымдастырған жыр тұйғыны, төкпе жырау, айтыскер ақын Таңжарық Жолдыұлының 120 жылдық мерейтойына арналған «Белгілі алты алашқа жазған хатым» атты республикалық жазба ақындар мүшәйрасында 1 орынды иеленді. Сөйтіп, арнайы дипломмен, Таңжарық ақынның төсбелгісімен марапатталып қайтты.
Аршындай арқалы ақын, талантты өнер иесі өткен жылы мемлекеттік гимн авторларының бірі, ақын, жазушы, мемлекеттік сыйлықтың иесі Жұмекен Нәжімеденов атындағы «Елім менің» атты көркемсөз оқу шеберлерінің республикалық байқауында бас жүлделі болған еді. Т. Жүргенов атындағы өнер академиясының айтулы түлегі республикалық Қасым Аманжолов оқулары байқауының жүлдегері, Елбасы қоры ұйымдастырған «Алтын тобылғы» әдеби сыйлығының, Алашорданың 100 жылдығына орай тағайындалған М. Әуезов атындағы әдеби сыйлықтың және Алматы облысы әкімдігі тағайындаған «Ақ қауырсын» әдеби жүлдесінің иесі. «Айқасқа» атты жыр жинағының авторы. Талантты жас ақынның шығар биіктері алда.
Қанат БІРЖАНСАЛ.