Қонаев қаласында Алматы облысы әкімдігінің қолдауымен «Ауылым – алтын бесігім» атты ауылдық Мәдениет үйлер мен клубтар, кітапханалар және музейлер арасында өткен облыстық байқаудың қорытындысын жариялау, үздіктерді марапаттау шарасы өтті. Облыстык мәдениет, архивтер және құжаттама басқармасы ұйымдастырған бұл салтанатты басқосуда байқау нәтижесіне байланысты 27 марапат тапсырылды. Солардың арасынан Қарасай ауданының абыройын арттырған Шамалған ауылының Мәдениет үйі мен кітапханасы үздік деп табылып, бас жүлдеге ие болды. Жеңімпаздарға арнайы диплом, музыкалық аппаратура, және 200 мың теңгенің сертификаты табысталды.
Марапаттау рәсіміне Қарасай аудандық ішкі саясат, мәдениет және тілдерді дамыту және спорт бөлімінің басшысы Күлжан Дүйсенова, Қарасай аудандық Мәдениет үйінің директоры Айдар Айтмухамбетов, Шамалған ауылдық Мәдениет үйінің директоры Шарбану Қалиева, Қарасай аудандық кітапхананың директоры Ұлдархан Өтеева, Шамалған ауылдық кітапхананың директоры Айман Үмбеталиева және Шамалған Мәдениет үйінің ұжымы қатысты.
Қонаев қаласында өткен марапаттау шарасы концерттік бағдарлаға ұласты. Салтанатты кеште Шамалған ауылдық Мәдениет үйінің өнерпаздары гала концертте өнер көрсетті. Концерттік бағдарламаны «Үшқоңыр» квартетінің әншілері «Мәңгілік ел» әнімен қорытындылады.
Естеріңізге сала кетейік, дәл осы байқауға 2020 жылы Қарасай ауданының атынан Іргелі ауылының Мәдениеті үйі қатысса, 2021 жылы Береке ауылдық Мәдениет үйі бақ сынады. Қос өнер ордасы арнайы дипломмен, дыбыс аппаратурасымен марапатталған болатын. Биылғы бұл байкаудың іріктеу кезеңі қазан айының 7-13 күндері аралығында әр ауданда ұйымдастырылды. Солардың ішінен 10 ауылдық Мәдениет үйі, 10 ауылдық кітапхана, 5 ауылдық музей катысты.
«Ауылым – алтын бесігім» атты облыстық байқауда бақ сынау үшін Шамалған ауылдық Мәдениет үйіне қолдау көрсеткен Қарасай ауданының әкімдігіне, Қарасай аудандық Мәдениет үйінің директоры Айдар Кеңесханұлына, Шамалған ауылдық округінің әкімі Ержас Тоқтасыновқа, ауыл ақсақалдары мен әжелеріне және байқауға қатысушы Шамалған ауылының өнерпаздарына алғысымызды білдіреміз!
Айсулу ДЖУМАШЕВА,
Шамалған ауылдық Мәдениет үйінің әдіскері.