Өткен аптаның жұмасы күні аудан әкімі Жандарбек Далабаев таяуда өткен Азия чемпионатында ауданымыздың ғана емес, сондай-ақ, еліміздің атын шығарған қаскелеңдік жас спортшы Тимофей Патошовқа Алғыс хат табыс етті.
Газетіміздің өткен санында Иордания мемлекетінің астанасы – Амман қаласында жастар арасындағы бокстан өткен Азия чемпионатына жерлесіміз Тимофей Геннадийұлының қатысқанын және құрлық чемпионатының қола жүлдегері атанғандығын жазған едік.
Ал өткен аптада 12 жасынан бастап бокспен кәсіби түрде айналысып, көптеген халықаралық ареналарда жеңіске жетіп, еліміздің атын шығарып жүрген жас спортшының осы үлкен жетістігін ескерген Жандарбек Ермекұлы оны аудандық әкімдікке арнайы шақырып, құрмет көрсетті. Нақтырақ айтқанда, аудан басшысы қола жүлде иегеріне ризашылығын білдіріп, алдағы жарыстарына сәттілік тілеп, Алғыс хат пен қаржылай сый-сияпат табыс етті.
Сондай-ақ, осы күні жас спортшымен бірге 27 жыл бойы болашақ жеңімпаздарды даярлаумен айналысып, Тимофейді де аталмыш чемпионатқа дайындаған жаттықтырушы, «Үздік жаттықтырушы» атағының иегері Ерғали Қоңлыбаев пен кейіпкеріміз тәлім алатын Қарасай ауданының №2 балалар мен жасөспірімдер спорт мектебінің директоры Қайрат Биримжановқа да Алғыс хаттар берілді.
Ақтоты МЫРЗАБЕКҚЫЗЫ.