Озық оқушыларын дайындайтын мектептердің қатарындағы Алматы облысына танымал, талай оқушылардың зейінін ашып, жетістікке жетелейтін «CES for You» орталығының филиалы өткен аптаның жұмасында Бекболат ауылында ашылды. Салтанатты шараға қатысқан Бірінші Май ауылыдық округі әкімінің орынбасары Хизат Молдыбаев пен «CES for You» мектебінің бас директоры Арайлым Қайратқызы ақжарма тілектерін білдіріп, өнерлі жандар өздерінің ән-шашуларын арнады. Одан кейін ауыл ақсақалдары Бақытжан Сарбасов пен Мақсат Мералы жаңа мекеменің қызыл лентасын қиды.
Айгүл Тәңірбергенова басшылық ететін орталықтың жұмысы 2013 жылы басталған. Осы уақытқа дейін 19 орталығы бар білім мектебі, енді, міне, 20 филиалымен толықты. Біріншімайлықтар осыған дейін шағын тіл үйірмелерінде орын жоқ болғандықтан Шамалған ауылына немесе Қаскелең қаласына барып білім алатын. Тұрғындардың өтініші бойынша ашылған «CES for You» орталығының Бекболат ауылында орналасқан қос қабатты нысанында 350-ге жуық тіл үйренушілерге жағдай жасалған.
Оқу жоспары 8 деңгейге бөлініп, оқушы ең төменгі beginner деңгейінен бастап, ең жоғарғы business-proficiency деңгейіне дейін оқиды. Бала бірінші деңгейден екінші деңгейге өту үшін емтихан тапсырады. Екінші деңгейден өткен бала орталықтағы үздіктер сыныбы «Көшбасшы» деген топқа ауысады. Мұндағы балалар жазғы демалыс айларында ҰлыБритания, Франция мен Малайзия мемлекеттеріне бір айға оқуға барады. Жыл сайын әлеуметтік жағдайы төмен отбасыдан шыққан 100 баланың тегін оқуына грант та бөледі.Оларға қазақстандық университеттерді бітірген, ағылшын тілін жетік меңгерген тәлімгерлер мен практика жүзінде оқушылардың тез дағдылануы үшін шетелдік ұстаздар да білім беретін болады. Солардың бірі, орталықтың қызметкері мистер Okorie біріншімайлықтарды жаңа білім беру мекемесімен құттықтады. Ауыл тұрғындары да заманауи бағытта оқытатын, білікті мамандардан құралған орталықтың ашылғанына дән риза. Орталықтың негізгі мақсаты – дарынды оқушылардың қатарын арттырып, білімдік бәсекедеге оза шабатын, ғылымның тілінде еркін сөйлеп, елдің абыройын арттыратын шәкірт тәрбиелеу.
Бұрым ОРЫНБАСАР.