Өткен аптадағы сенбі күні Қаскелең қаласындағы Жанғозин көшесінің бойындағы көп қабатты үйлердің бірінде «TAS GROUP» компаниялар тобының және де «Асыл тас» қоғамдық қорының кішкентай қарасайлықтарға сыйға тартқан жаңа жаздық ойын алаңының ашылу салтанаты өтті.
Заманауи алаң (футбол алаңы, балалар ойын алаңы) екі бөлікке бөлінген. Бірінші бөлігінде арнайы жасанды көгал төселіп, балалардың футболмен айналысуларына арналған үлкен алаң жасалған. Екінші бөлігінде кішкентай бүлдіршіндерге арналған әткеншектер, сырғанақ, өрмелеуіш, төбесі жабылған ойын құрылғылары орнатылған. Жалпы айтқанда, құрылыс жұмыстарына 15 млн. теңге кеткен жазға алаңда балалардың бос уақыттарын тиімді өткізуіне, еркін ойнауына барлық қолайлы жағдай жасалған.
Кішкентай қарасайлықтарға арналған алаңның лентасын салтанатты түрде «TAS GROUP» компаниялар тобының негізін қалаушы Дулат Тастекеевпен бірге аудан басшысы Жандарбек Ермекұлы қиып, демеушілік көрсеткен компанияға ақ алғысын айтып, ата-аналар мен балаларды айтулы игі бастаманың жүзеге асуымен құттықтады.
– Бүлдіршіндердің емін-еркін ойнап, жетілуіне біз әрқашан жағдай жасауға міндеттіміз. Осы ретте Дулат Тұрсынұлының басқарып отырған «TAS GROUP» компаниялар тобының аудан халқына жасап отырған сыйы басқаларға жақсы үлгі. Жалпы біз ауданымызда осындай 10 ойын алаңдарын ашуды жоспарлаған болатынбыз. Бүгін, міне, соның төртіншісі ашылды, – деді аудан асшысы. Әкімнен кейін сөз кезегі Дулат Тұрсынұлына беріліп, ол жиналған қауымды бүгінгі қуаныштарымен құттықтап, аталмыш алаңды салу үшін бос жер табуға көмек көрсеткен аудан әкімдігіне алғысын білдірді. Жазғы алаңның ашылу салтанатына орай «Дәстүр шоу» ансамблінің ұжымы мерекенің көркін қыздырды.
Шара барысында өнерпаздар өздерінің әдемі де әсем әндері мен мың бұралған билерімен ашылу салтанатын тамашалауға келгендердің көңіл-күйлерін көтерді. Сондай-ақ, ауданымыздағы «Парасат» футбол клубының шәкірттері жаңадан ашылған футбол алаңында доп тебуден шеберліктерін көрсетті.
– Балалардың қамқоршысы болып, сауабы мол іске атсалысу әр адамның азаматтық парызы деп ойлаймын. Осындай мақсатты біз жалпы жыл сайын «Асыл тас» қоғамдық қоры арқылы көптеген игі жұмыстарды жүргізіп отырамыз. Мәселен, өткен жылы біз Қаскелеңде «Жағалау» атты скейт-парк ашқан едік. Бүгін, міне, балалар үшін спорттық жазғы алаң ашып отырмыз. Бұл ең бірінші кезекте балаларымыздың қуанышы үшін жасалып отырған іс. Өзіміз ынтымақ танытып, бірлесіп ортақ игілікке атсалыса берсек, болашақта біздің еліміз ең көрікті ортаға айналады деп ойлаймын, – деді тағы «TAS GROUP» компаниялар тобының негізін қалаушы Дулат Тастекеев.
Шара соңында тұрғындарға осы күннен естелік ретінде Мұхтар Шахановтың әндер жинағы – кітаптар тарту етілді.
Ақтоты МЫРЗАБЕКҚЫЗЫ.