90 ЖАСТАҒЫ ТӨРТКЕН КЕНЕНҚЫЗЫ РЕФЕРЕНДУМДА ДАУЫС БЕРІП, ЕЛГЕ БАТАСЫН БЕРДІ

Іле ауданындағы референдум учаскелерінің бірінде ерекше әрі тағылымды сәт орын алды. Қазақтың әйгілі ақыны әрі композиторы Кенен Әзірбаевтың қызы, 90 жасқа толған Төрткен Кененқызы республикалық референдумға арнайы келіп, өз таңдауын жасады. Құрметті ана жасының ұлғайғанына қарамастан, ел өміріндегі маңызды қоғамдық-саяси науқаннан шет қалмай, азаматтық борышын орындау үшін дауыс беру учаскесіне өзі келгенін айтты.
Ақ жаулықты ана учаскеге келген кезде тұрғындар мен комиссия мүшелері оған ерекше құрмет көрсетіп, жылы қарсы алды. Жиналған жұртшылық Төрткен Кененқызының белсенділігіне ризашылықтарын білдіріп, ақ тілектерін айтты.
Дауыс беру рәсімінен кейін Төрткен Кененқызы учаскеге жиналған азаматтарға ақ батасын беріп, елге амандық, жұртқа бірлік пен береке тіледі. Оның жүрекжарды батасын алған тұрғындар ақ жаулықты ананың сөзін ықыласпен тыңдап, үлкен құрмет көрсетті. Бұл сәт учаскеге келгендер үшін ерекше әсерлі әрі есте қаларлық оқиғаға айналды.
Учаскеге өзі келіп дауыс беруінің себебі туралы сұрағанымызда, Төрткен Кененқызы әр азамат үшін ел тағдырына қатысты маңызды шешімдерге қатысу – үлкен жауапкершілік екенін атап өтті.
«Ата Заң – мемлекеттің негізі. Сондықтан әр адам бейжай қарамай, өз пікірін білдіруі керек. Жасым тоқсанға келсе де, халық үшін маңызды іске қатысуды азаматтық парызым деп санаймын. Еліміз аман, жұртымыз тыныш болсын. Баршаңызға бірлік, береке тілеймін», – деді ол.
Тұрғындар Төрткен Кененқызының бұл қадамын үлкен өнеге ретінде бағалап, оның азаматтық белсенділігі жастарға үлгі болатынын айтты. Ақ жаулықты ананың ел болашағына бейжай қарамай, референдумға арнайы келіп қатысуы көпшілікке ерекше әсер қалдырды.
Осылайша, Іле ауданындағы референдум күні тек дауыс беру рәсімімен ғана емес, сондай-ақ үлкендер өнегесі мен баталы сөздерге толы тағылымды сәттерімен де есте қалды. Төрткен Кененқызының ақ батасы мен азаматтық ұстанымы жиналған жұртшылыққа рухани күш беріп, ел бірлігінің маңызын тағы бір мәрте айқындай түсті.