37 отбасы шаңырақ шаттығына кенелді

Жыл сайын дәстүрлі түрде шілде айының алтысы күні еліміздің орталығы, әсем қала Астананың мерекесі аталып өтеді. Осы күнге орай республиканың өзге өңірлеріндегідей Қарасай ауданында да бірқатар іс-шаралар ұйымдастырылды. Мәселен, осы аптада мереке аясында 37 қарасайлық отбасы қоныс тойын тойлады.

Анығырақ айтқанда, аптаның сәрсенбісі күні аудан әкімдігінде тұрғын үй кезегінде тұрған бір топ отбасыға салтанатты түрде жаңа баспана кілті табыс етілді. Көпке қуаныш сыйлаған шараны аудан әкімі Жасұлан Естенов ашып, жиналғандарды ғажайып ғимараттарымен, ерекше келбетімен тартатын Астана қаласының мерекесімен құттықтап, ауданның дамуына біраз тоқталып өтті.
– Өздеріңіз білетіндей, алдағы күндері халқымыздың тәуелсіздік жылдарындағы ең ірі жетістіктерінің бірі – Астана қаласының құрылғанына 27 жыл толғалы отыр. Сондықтан алдымен бүгінгі шараға қатысып отырғандарды Қазақстанның саяси, экономикалық және рухани өмірінің басты орталығына айналған Астана қаласының күнімен құттықтағым келеді.
Бүгінде қарыштап дамып келе жатқан еліміздің негізгі бағыты халықтың әл-ауқатын жақсарту болып отыр. Осы ретте мемлекет тарапынан мұқтаж азаматтарға әртүрлі қолдау көрсетілуде. Мәселен, соның аясында өткен жылы біздің Қарасай ауданында сатып алу құқынсыз мемлекеттік тұрғын үй қорынан 85 мұқтаж отбасы баспаналы болды. Ал ағымдағы жылдың басынан бері тағы 36 отбасыға пәтер кілті берілді. Бүгін міне олардың қатарына тағы 37 отбасы қосылды. Осылайша соңғы бір жарым жыл ішінде 158 отбасы өз шаңырағына ие болды.
Мұның бәрі – халықтың әл-ауқатын арттыруға, әлеуметтік қолдауды күшейтуге бағытталған мемлекеттік саясаттың нақты көрінісі, – деді аудан басшысы. Мұнан соң Жасұлан Тоққожаұлы көптен күткен қуанышын иелеріне тұрғын үй кілтін табыстап, жаңа баспаналары оларға бақыт, береке және шаттық әкелсін деп ізгі тілегін жеткізді.
Аталған шарада үйлі болған отбасылар – тұрғын үй кезегінде тұрған халықтың әлеуметтік осал тобына жататындар. Яғни 37 кілттің екеуі зейнет жасына жеткендерге, алтауы мүгедектігі бар балалар немесе оларды тәрбиелеп отырған отбасыларға және 29-ы толық емес отбасыларға берілді. ҚР Үкіметінің «Тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасын бекіту туралы» қаулысына сәйкес республикалық және жергілікті бюджет есебінен сатып алынған жалдамалы баспаналар тұрғындарға «Арнау» тұрғын үй кешені мен «Сәукеле» ықшам аудандарынан берілді.
Бұл күні баспана бақытына бөленгендер арасында қарасайлық көп балалы ана Гүлнұр Әсемова да болды. Көптен күткен арманы орындалған тұрғын осы күнді 10 жылдан артық күткен екен.
– Бүгін жаңа пәтеріміздің кілтін алып, қуанышқа бөленудеміз. Мемлекет тарапынан көпбалалы отбасыларға көрсетіліп жатқан қолдауға, оған қол жеткізуге көмектескен аудан басшылығына зор алғысымды білдіремін. Бұл күн – біз үшін нағыз мереке. Осындай қуанышты күндеріміз көп болсын, – деді көп балалы ана.
Айта кетейік, 350 мыңнан астам халық өмір сүріп жатқан Қарасай жерінде қазіргі таңда 6 мыңға жуық адам үй кезегінде тұр. Азаматтардың тұрғын үй мәселесін шешу мақсатында республикалық және жергілікті бюджет есебінен жалға берілетін бастапқы және қайталама тұрғын үй нарығындағы пәтерлер сатып алынуда.

Ақтоты МЫРЗАБЕКҚЫЗЫ