Алматы облысы әкімінің қолдауымен, Жетісу өңірі ақын-жазушыларының және басқа да дарынды жеке тұлғалардың еңбектері мен естелік кітаптарын қалың оқырмандарға насихаттау, кітапхана қорын өлкетану әдебиеттерімен толықтыру мақсатында, 100 томдық «Жетісу кітапханасы» жобасы жүзеге асырылуда.
Ауқымды шара Елбасы Н.Ә.Назарбаевтың «Рухани жаңғыру» бағдарламасын іске асыруға бағытталған. «Жетісу кітапханасы» сериясын 2018-2020 жылдар аралығында шығару жоспарлануда. Көптомдық кітаптарды шығарудағы негізгі мақсат – қазақ жазушылары мен ақындарының шығармашылығын жүйелеу, таңдамалы шығармаларын өскелең ұрпаққа мұра қылып қалдыру.
Қазіргі таңда, аудандық кітапхананың ұйымдастырумен қарасайлықтар арасынан үш ақын-жазушымыздың еңбектері жинақталып, баспадан шығарылатын жинақтарының электрондық нұсқалары дайындалды. Үш жазушының еңбегі жобаға ұсынылды.
Атап айтсақ, Қазақстан жазушылар одағының мүшесі, ауданымыздың Құрметті азаматы, Жамбыл атындағы халықаралық сыйлықтың лауреаты, белгілі ақын Ш.Садықанұлының «Жарық дүние» атты өлеңдері мен поэмалары таңдалды. Өлеңдері мен поэмаларында адам өмірінің саналуан қырларын, адамгершілік, достық, адалдық тақырыптарын, қуаныштары мен басқа түскен ауыртпалықтарын толғайды. Автор Отанды, туған жерді жырына арқау ете отырып, көңілге мақтаныш сезімін ұялатады.
Екінші таңдалғаны, Қазақстан жазушылар одағының Ілияс Жансүгіров атындағы сыйлығының иегері, Түркі поэзиясы халықаралық фестивалінің, Тәуелсіз «Платиналы Тарлан» сыйлықтарының лауреаты Исраил Сапарбаевтың кейінгі жылдары жазылған өлеңдері және оның сахнада қойылып жүрген пьесалары жинақталған «Махаббат пен Ғадауат» атты жинағы. Онда «Адам ата», «Хауа ана», «Кемпір алып қашу» атты поэтикалық драмалық шығармалары бар. Олар тақырыптық жағынан бүгінгі өзекті мәселелерді қозғауымен құнды.
Үшінші таңдалғаны, Қазақстан жазушылар одағының мүшесі, айтыскер ақын, Серік Қалиевтың соңғы жылдары жазылған «Жүздесу», «Болашаққа хат», «Көңіл терезесі», «Иманым менің жинағым» атты отансүйгіштік, ұлтжандылық, адами қасиеттер мен рухани құндылықтарды насихаттайтын өлең-жырлары іріктеліп алынды.
Жарыққа шығатын бұл жинақтардың оқырман қауымды қызықтыратын туындылар боларына сенеміз.
К .СОПБАЕВА,
аудандық кітапхананың әдіскері.