Елбасының туған жерінде орналасқан «Атамекен» тарихи-мәдени орталығында мереке сайын көптің қөңіліне ұнамды игі шаралар өткізіліп келеді. Өткен аптаның жұмасында аталмыш орталықтың ұжымы, «1 желтоқсан – ҚР Тұңғыш Президенті күні» аясында, «Елбасы туған жерде» атты мерекелік іс-шара ұйымдастырып, құтты қонақтарына ерекше көңіл-күй сыйлады. Айтулы мейрамның құрметіне орай орталыққа ауданның зиялы қауым өкілдері, белгілі азаматтар және тағы басқа мәртебелі меймандар шақырылды. Олардың бірқатары «Атамекен» тарихи-мәдени орталығының арнайы Алғыс хатымен марапатталып, өнерпаздардың концерттік бағдарламасына куә болды. Сонымен қатар, мерекелік басқосу барысында осы орталықтың директоры Аделия Қоржумбаева мәдени ошақтың екі жылдық есебін беріп, маңызды ақпарттардан құлағдар етті.
Осылайша, Тұңғыш Президент күніне орай ұйымдастырылған маңызды жиын көңілді нотамен басталып, оның жалғасы тағылымды рухани шараға ұласты. Атап айтқанда, Елбасының «Ұлы даланың жеті қыры» атты мақаласын кеңінен насихаттау үшін «Көнергенмен өзі, көненің көзі» атты көрме ұйымдастырылып, жәдігер жинауға жаны құмар Әуесхан Мажайқызының тың дүниелері қонақтарға таныстырылды. Жетпіс жастың жетегіндегі әжейдің V ғасырлық тарихы бар мұраларының қай-қайсы болмасын өткеннен сыр шертетін және қасиетін жоғалтпаған құнды дүниелер екені көрініп-ақ тұрды. Олардың арасында тарихта аты қалған Қызай қалпақ, Солтангелді бидің күмістелген ер тоқымы, Жансарбай емшінің емдеу құралдары және тағы басқа көне заттар бар. Бір айта кетерлігі, бұл көне жәдігерлердің иесі саналатын Әуесхан Мажайқызы барлығын «Атамекен» тарихи-мәдени орталығына тарту етіп, естелікке қалдырып отыр. Ал, апамыздың жәдігерлерінен хабары мол, өлкетанушы әрі ұлы Қажет Андастың айтуынша, алдағы уақытта анасының бағалы саналатын тың дүниелері басқа да көрмелердің қатарында көрінетін болады.
Дидар МУХАМАДИЕВ.