Мансап орталықтары спорттық жарыста бақ сынады

Мемлекет басшысы Қасым-Жомарт Тоқаевтың бастамасымен 2025 жыл «Жұмысшы мамандықтары жылы» деп жарияланған еді. Осыған байланысты халықты жұмыспен қамту бағытында қызмет ететін Алматы облысының Еңбек мобильдігі орталығы қызметкерлерін алдағы жылға жігерлендіру мақсатында облыстық спартакиада ұйымдастырды.
Шамалған ауылындағы «Ushqonyr» спорт кешенінде өткен жарыста жоғарыда аталған орталыққа қарасты Мансап орталықтарының қызметкерлері волейболдан сайысып, өзара мықты команданы анықтады.

Кешеннің үлкен спорт залында бас қосқан қатысушылардың бұл күні көңіл-күйлері көтеріңкі болды. Күнделікті кеңсенің күйбең тірлігінен бой жазып, бір серпілтіп, өздерін жаңаша қырдан танытуға мүмкіндік алды. Облыстық Еңбек мобильдігі орталығынан, Қонаев пен Алатау қаласы және тоғыз ауданның мансап орталықтарынан құралған 12 команда спорттық сайыстың ашылу салтанатында алдымен Гимн орындап, барша қатысушылар Мемлекеттік Туға қарап сап түзеді. Мұнан кейін шараның алғашқы құттықтау сөзін облыстық Еңбек мобильдігі орталығының директоры Абылай Зуайда алып, қатысушыларға сәттілік тіледі.
– Өздеріңіз білетіндей, Үкіметтің кеңейтілген отырысында биылғы жылды Президентіміз Қасым-Жомарт Тоқаев «Жұмысшы мамандықтары жылы» деп жариялаған еді. Бүгінгі таңда бұл бағытта белсенді жұмыстар атқарылуда. Біздің орталықтарға жүгінгендер әртүрлі бағдарлама арқылы жұмыспен қамтылуда, ісін бастағысы келетін кәсіпкерлерге қолдау көрсетілуде, жұмысшы мамандықтарды даярлайтын оқу орындары мен кәсіпорындар арасында тығыз байланыс орнатылып, студенттерге өз саласы бойынша практикалық уақыттар қамтамасыз етілуде. Мұның бәрі жасалып жатқан шаралардың жартысы ғана. Ал жақсы нәтижелер мына сіздердің арқаларыңыз. Алғысымды білдіремін!
Бүгінгі ойын арқасында жұмыстан бір сәт үзіліс жасап, сергіп, жақсы демалып, көп позитив аласыздар деп ойлаймын, – деді Абылай Жұмабекұлы.
Одан кейін «AMANAT» партиясының Қарасай аудандық филиалының төрағасы Қаныбек Айтжанов, «AtlantMedia» ЖШС-нің директоры, аудандық «Naqty» газетінің бас редакторы Атлана Исаева және аудандық мәслихат депутаты Бекжан Сүнбеков сынды құрметті қонақтар сөз сөйлеп, командаларға сәттілік тіледі.
Олимпиадалық жүйемен жүргізілген жарыс өте қызықты әрі тартысты өтті. Күнделікті өмірде облысымыздың әл-ауқатын жақсартып, алға жылжуына өзіндік үлесін қосып жүрген жандар кәдімгі спортшылардан кем түспеді. Әсіресе алғашқы шыққан командалардың ойынын көргеннен кейін өзгелердің жарысқа, жеңіске деген қызығушылығы тек арта түсті. Команда мүшелері әр ұпай үшін таласып, тартысты ойын өрнегін көрсетуге тырысты. Оған қоса бұл күні қызметкерлер өзара жеңімпазды анықтап қана қоймай, сондай-ақ барынша көңіл көтеріп, жақсы демалуға мүмкіндік алды.
Десе де кез келген жарыс болған жерде жеңіс пен жеңіліс қатар жүретіні анық. Қызу да тартысты әрі күлкілі сәттерге толы болған спартакиада нәтижесінде өз тобында қарсыластарының бәрінен басым түсіп, дес бермеген Кеген ауданының командасы жарыстың жеңімпазы атанып, І орынды қанжығасына байлады. Ақтық сында ғана қарсыласқа есе жіберген Жамбыл мен Райымбек командалары өзара ІІ орынды бөлісті. Ал үздік үштікті Талғар ауданының командасы аяқтады.
Сонымен қатар үздік ойыншылар да марапат тұғырынан көрінді. Мәселен, төрешілер шешімі бойынша волейболдан топтар арасында «Ең жақсы командалық киім» номинациясы бойынша Іле ауданы жеңімпаз атанды. Мұнан бөлек ойынның ең «Үздік волейболшысы» болып біздің Қарасай ауданының Мансап орталығының бөлім басшысы Абзал Нұсқабай атанса, қыздардан «Үздік волейболшы» Еңбек мобильдігі орталығының қызметкері Асемай Ералы болды. «Үздік байланыстырушы» Еңбекшіқазақ ауданының команда мүшесі Дәурен Ташбаев, ал «Үздік шабуылдаушы» болып Ұйғыр ауданының команда мүшесі Талант Ахметов атанды.

Ақтоты МЫРЗАБЕКҚЫЗЫ.