Қарасай ауданына қарасты қала мен ауылдық округтегі орталық көшелердің тазалағына енді «Amanat cleaning» компаниясы жауапты. Аталмыш мердігер мекеме Қарасай ауданының жолаушылар көлiгi және автомобиль жолдары бөлiмiмен келісімшартқа отырып, 2024 жылдың 1 наурызынан бастап жұмысқа кірісті. Тазалыққа жауапты компания өз міндеттерін ағымдағы жылдың соңына дейін атқарады.
«Amanat cleaning» компаниясы жолдарды күтіп ұстау, жол жиектерін тазалау, шұңқырларды жөндеу сияқты көше бойына қатысты жұмыстарды жүргізеді. Қазіргі таңда Қаскелең қаласындағы Жанғозин, Байғазиев, Өмірәлі, Наурызбай батыр, Мақашев және тағы басқа да басты көшелерді бастан-аяқ тазартумен айналысуда.
Компания директорының орынбасары Алмас Тынысбектің сөзіне сүйенсек, алдағы уақытта ауданға қарасты басқа да округтегі бірқатар көшелер ретке келтірілмек. Мәселен, мектеп, аурухана сияқты әлеуметтік нысандарға апаратын жолдардың бойы жиналып, жан-жағы абаттандырылады.
Айта кетейік, аудан көшелерін ретке келтіру бойынша аталмыш компанияның 7 техникасы мен 30 қызметкері бекітілген жұмыс тәртібі бойынша күнделікті қызмет атқаруда.
Өз тілшіміз.