Бүгін, Қазақстан Республикасы Құрылтайы депутаттарын сайлау күні, өз таңдауын Жамбыл ауданы Қарғалы ауылының тумасы, 2025 жылғы Сурдлимпиада ойындарының грек-рим күресінен чемпионы, 67 келіге дейінгі салмақ дәрежесінде алтын медаль иеленген Андрей Самарин жасады.
Самариннің әлемдік күрес додаларындағы биік белестерге жету жолы оңай болған жоқ. Туған ауылындағы жаттығулардан бастап халықаралық ареналардағы жеңістерге дейін жеткен спортшы Токиода өткен Сурдлимпиада ойындарында Иран, Қырғызстан және басқа да елдердің мықты балуандарын сенімді түрде жеңіп, жоғары шеберлігін көрсетті. Бүгінде оның дауысы спортшының рух күшін, еңбекқорлығы мен азаматтық жауапкершілігін ұштастыра білудің символына айналды.
«Әр дауыс маңызды. Спортта мен соңына дейін күресуді үйрендім, ал өмірде әр азамат елдің болашағы үшін өз таңдауын жасай алады. Бүгін туған жерімде өзімнің дауыс беру құқығымды мақтанышпен жүзеге асырдым», – деді чемпион дауыс бергеннен кейін.
Андрей Самариннің Сурдлимпиада ойындарындағы жеңісі Қазақстан үшін тарихи жетістік болды. Оның алтын медалі ұлттық құраманың халықаралық аренадағы беделін арттырып, жүздеген жас спортшыға шабыт берді. Оның сайлауға қатысуы тәртіп, мінез бен жауапкершілік тек бозкілемдегі жеңімпазға тән қасиеттер ғана емес, нағыз азаматқа да қажет екенін көрсетеді.
Андрей Самариннің өнегелі жолы – спорттағы жетістік, табандылық және туған жерге деген сүйіспеншіліктің әр қазақстандықты ел өміріндегі маңызды оқиғаларға белсенді қатысуға шабыттандыра алатынының жарқын көрінісі.