Жастар – қоғамның қозғаушы күші. Расымен де, биылғы жылдың қиын болғанына қарамастан аудан жастарының біліктілігі, білімділігі, ауызбіршілігінің мығым болуымен талай игі істердің атқарылып жатқандығының куәсі болудамыз. Әсіресе, қоғамдағы оқиғаларға бей-жай қарамайтын, көмекке мұқтаж жандарға көмек көрсететін ерікті жастардың өнегелі істерін атап өтпеске болмайды. Олар қиын кезеңде аудан кәсіпкерлерімен бірге әлеуметтік тұрмысы төмен отбасыларға азық-түліктер мен қорғаныш заттарын таратқан. Осындай игі істерге қол ұшын берген жастардың жетістіктері, газетіміздің өткен санында қысқаша жарияланғандай, Алматы облысының жастар саясаты басқармасына жаңадан тағайындалған басшысы Елдар Сапаров пен аудан әкімінің орынбасары Күлжан Дүйсенованың қатысуымен өткен жиында айтылған еді.
Жастарға арналған маңызды жиында төрт мәселе көтеріліп, оларға қатысты мамандар өз салаларына байланысты атқарылған жұмыстар жайлы баяндама оқып, қатысушылар тарапынан қойылған сауалдарға жауап берді. Нақтырақ айтқанда, бірінші мәселе жайлы аудандық жастар ресурстық орталығының жетекшісі Айжан Балажанова баяндап, 2020 жылда ауданымыздың белсенді жастарының карантин кезінде жасаған жұмыстары, өткізген қайырымдылық шаралары мен облыс және республика көлемінде өткен байқауларда қандай жетістікке жеткендері жайлы айтып өтті.
Мұнан кейін күн тәртібіндегі екінші мәселе жастарды жұмыспен қамту бойынша «Атамекен» кәсіпкерлер палатасының аудандық филиалының кеңесшісі Елена Константинова баяндап, жас кәсіпкерлерге арналған «Еңбек», «Жастар практикасы», «Бизнестің жол картасы – 2025» сияқты мемлекеттік бағдарламалар жайлы әңгімеледі. Елена Владимировнаның айтуынша, «Еңбек» бағдарламасының бірінші бағыты бойынша қысқа мерзімді оқыту курстарынан 50-жуық адам өтіп, мамандық иегерлері атанды. Сондай-ақ, осы бағдарламаның қайтарымсыз грант деген тағы бір бағыты бойынша 17 адам өздерінің бизнес-жобасын қорғап, 200 АЕК көлемінде қаражат алды. Тағы 10 адамға өздерінің кәсіптерін одан ары дамыту үшін жалпы құны 49 млн. 800 мың теңге несие берілді. Сонымен қатар, жастар практикасына 1417 адам бағытталып, алты айлық мамандықтарына сай тәжірибеден өтіп, 870-ке жуығы жұмыспен қамтылды. Ал, «Бизнестің жол картасы – 2025» бағдарламасы бойынша өздерінің жобаларын қорғаған 7 қарасайлыққа жалпы құны 15 млн.теңге несие берілді. Мұнан бөлек, аудандық филиалы кеңесшісінің айтуынша, «Атамекен» кәсіпкерлер палатасының жасаған «Бизнес негіздері» атты жобаның аясында 9-11 сынып оқушыларымен студенттерге бизнес-тренингтер өткізілуде. Карантинге байланысты олардың барлығы онлайн түрде ұйымдастырылуда.
Күн тәртібіндегі үшінші мәселе бойынша ауданаралық көпсалалы ауруханасының «Жастар денсаулық орталығының» менеджері Дана Таждинова жауап берді. Оның айтуынша, 2019 жылы ашылып, 15-29 жас аралықтарындағы топтағы адамдармен жұмыс жасайтын орталық карантинге қарамастан өз жұмысын белсенді атқаруда. Ашылғаны 2 жыл ғана болғанына қарамастан орталық психологтарының жұмыстарынын арқасында аудандағы жас қыздардың жасанды түсік жасатуы, жыныстық жолмен берілетін вирустармен тіркелген жастар саны азайған. Бүгінде орталықта психолог, гинеколог, дермотолог, әлеуметтік қызметкер сияқты мамандар жастармен бетпе-бет немесе сенім телефоны арқылы жұмыс жасауда.
Ал, жасөспірімдер арасындағы құқық бұзушылық жайлы жергілікті полиция қызметінің ювеналды полициясының аға инспекторы Жұлдыз Бейсенбаева баяндама оқыды. Аға инпектордың мәлімдеуінше, 2020 жылы кәмелет жасқа толмаған 43 жасөспірімнің қатысуымен 32 қылмыс орын алған. Оның ішінде көлік немесе ақша ұрлау, адамның денсаулығына зиян келтіру сияқты тәртіп бұзушылықтар бар. Сонымен қатар, әртүрлі тәртіп бұзушылықтар жасаған 53 жасөспірім тіркеуге алынған. Жоғарыда айтып өткен қылмыстартың алдын алу мақсатында ювеналды полицияның қызметкерлері «Жасөспірім», «Түнгі қаладағы балалар» сияқты профилактикалық жұмыстар жүргізген. Жасөспірімдерге олардың құқықтарын, тәртіп бұзушылықтардың салдары қандай болатының түсіндіру мақсатында білім беру мекемелерінде 196 іс-шара өткізілген. Сондай-ақ, карантин кезінде білім бөлімімен бірлесіп, ата-аналармен де онлайн режимде жиналыстар ұйымдастырылған. Мұнан бөлек қашықтан оқыту кезінде жасөспірімдердің әртүрлі тәртіп бұзушылықтарға бармауларын қадағалау мақсатында жүйелі түрде рейдтер жүргізілген.Сол сияқты басқосуда қазіргі жасөспірімдер арасындағы буллинг, зорлық-зомбылық, өз-өзіне қол жұмсау, сондай-ақ, жұмыссыздық сияқты бірқатар өзекті мәселелер көтерілді. Нақтырақ айтқанда, жиында сөз алған Елдар Қайсарұлы Алматы облысында жасөспірімдер арасында өз-өзіне қол жұмсау, кәмелетке толмаған жасөспірімдердің жүкті болу көрсеткіші өткен жылға қарағанда өскеніне тоқталды. Бүгінде осы өзекті мәселелер бойынша облыстың психолог мамандары мен полиция қызметкерлерімен бірлесе құрылып жатқан жоба жайлы егжей-тегжейлі айтып өтті. Сонымен қатар, облыстық жастар саясаты басқармасының басшысы жастар үшін мемлекет тарапынан жасалған бағдарламаларды насихаттау жұмыстарын белсенді жүргізіп, жастар арасындағы жұмыссыздық мәселесін шешу қажеттілігіне де тоқталды.
Жиын соңында аудан әкімінің орынбасары Күлжан Әділханқызы сөйлеп, алдымен карантин кезінде көмек көрсетіп, үлкен жұмыстар атқарған белсенді жастарға алғысын білдіріп, жоғарыда айтылып өткен өзекті мәселелерді шешу үшін алдағы уақытта жасалатын жұмыстарға біздің де ауданымыз атсалысатындығын айты.
Ақтоты МЫРЗАБЕКҚЫЗЫ.