Бас прокуратураның қоғамдық мүдделерді қорғау қызметі басқармасының бастығы Азамат Сарғазин сайлау учаскелерінде тіркелген заңбұзушылық жағдайлары туралы ақпарат берді.
Жүргізілген мониторинг нәтижесінде сайлау туралы заңнаманы бұзудың 9 фактісі тіркелді. Бұл бұзушылықтар Алматы облысының Еңбекшіқазақ, Жамбыл, Райымбек және Ұйғыр аудандарындағы сайлау учаскелерінде орын алды, деп хабарлады Азамат Сарғазин.
Сондай-ақ, Жетісу облысының Қаратал және Кербұлақ аудандарындағы учаскелерде, Айыртау және Жамбыл аудандарындағы учаскелерде осындай бұзушылықтар анықталды.
«Бұл бұзушылықтар комиссия мүшелерінің азаматтарға басқа адамдарға дауыс беруге мүмкіндік беруімен байланысты. Бұл комиссиялардың мүшелері учаскелердегі жұмыстан дереу шеттетілді. Қазіргі уақытта жергілікті прокурорлар оларды «әкімшілік құқық бұзушылық туралы» Кодекстің 110-бабы бойынша жауапқа тарту бойынша шаралар қабылдауға кірісті», – деді Бас прокуратура өкілі.
Азамат Сарғазин әрбір сайлаушының өзі дауыс беретінін, дауыс беру құқығын басқа біреуге беруге немесе басқа адамға дауыс беруге жол берілмейтінін атап өтті.
Сонымен қатар, тағы бір бұзушылық – бюллетеньдер лақтыру – Алматы облысының Қарасай ауданында тіркелді.
«Алматы облыстық аумақтық сайлау комиссиясы «ID Senim R» медициналық орталығының ғимаратында орналасқан Қарасай ауданының № 455 сайлау учаскесінде сайлау бюллетеньдерін лақтыру фактісі бойынша мынаны хабарлайды – бұзушылықтарға жол берген учаскелік сайлау комиссиясының хатшысы мен мүшесі өз міндеттерін атқарудан шеттетілді», – деп хабарлады облыстық аумақтық сайлау комиссиясы.