Өткен аптаның сенбісі күні Қонаев қаласындағы Мәдениет үйінде ҚР Парламенті Сенаты депутаттарының сайлау өтті. Алматы облысы бойынша таңдаушы ретінде 204 мәслихат депуттаттың 185-і тіркеліп, өз таңдауларын жасады.
Қонаев қаласы
Алматы облысының мәслихат хатшысы Дәулет Жарасбаевтың айтуынша, Сенат сайлауына 5 азамат үміткер ретінде өзін-өзі ұсынған. Оның үшеуі сайлауға түсуге мүмкіндік алды. Олар – Кеген және Жамбыл аудандарынан ұсынылып отырған Жанболат Жөргенбаев, Жамбыл ауданынан ұсынылған Нұрлан Ертас, Балқаш ауданынан ұсынылған Ғалым Тоқпейісов.
Сонымен Орталық сайлау комиссиясы ҚР Парламенті Сенатының депутаттарын сайлауда Алматы облысы бойынша дауыс берудің алдын ала нәтижесін сол күні жариялады. Қорытындыға сәйкес, үміткер ретінде тіркелген үш кандидаттың ішінен Жанболат Жөргенбаев (83,2%) көп дауыс жинады. Оның кандидатурасын 154 таңдаушы қолдаған.
Естеріңізге сала кетейік, сайлау нәтижесінде 50%-дан астам дауыс жинаған кандидат Сенат депутаттығына өтеді.
Алматы облысынан Парламенттің Сенат депутаттығына өткен Жанболат Жөргенбаев жайлы қысқаша айта кетсек, ол 2021 жылдың қаңтарынан 2022 жылдың мамырына дейін Алматы облыстық мәслихат депутаты болған. Одан кейін Парламенттің Жоғарғы палатасы тарағанға дейін Сенат депутаты атанды. Биыл облыстың атынан қайтадан сайлауға үміткер ретінде бақ сынап, сайлау нәтижесі бойынша Сенат депутаттығына өтті.
Жанболат Жөргенбаев 1960 жылы Кеген ауданы Қарқара ауылында дүниеге келген. 1987 жылы В.И. Ленин атындағы Қазақ Политехникалық институтын «инженер-механик» мамандығын және Мемлекеттік агроөнеркәсіп кешенінің бас қызметкерлерін дайындайтын Бүкілодақтық институтты тәмамдаған. 2000 жылы Д.А.Қонаев атындағы гуманитарлық университеттің «құқықтану» мамандығы бойынша білім алған.
Жанболат Әкебайұлының еңбек өтілі төмендегідей:
1978-1992 жылдары – Талғар ауданы Алматы мал бордақылау кеңшарының инженері, жылутехнигі, ауылшарушылық дақылдарын өсіру бригадирі, аға инженері;
1992-1993 жылдары – «Дулат» коммуналдық мемлекеттік мекемесі директорының орынбасары;
1993-1998 жылдары – Киров ауылдық кеңесі төрағасының орынбасары, Киров ауылдық округінің әкімі;
1998-1999 жылдары – Алматы облысы Талдықорған ауданы әкімінің орынбасары;
1999-2001 жылдары – Қапшағай қаласы әкімінің бірінші орынбасары;
2001-2003 жылдары – Алматы облысы Қарасай ауданы әкімінің орынбасары;
2003-2005 жылдары – Консорциум «Идиль-Ақсу» ЖШС-де жоба жетекшісі;
2005-2006 жылдары – «Ақсу» АҚ вице-президенті;
2006-2009 жылдары – «Ақсу» АҚ директорлар кеңесінің төрағасы;
2009-2019 жылдары – «Қарасай Құрылыс» ЖШС-нің Бас директоры;
2019-2021 жылдары – «Nur Otan» партиясы (қазіргі «Amanat») Алматы облыстық филиалы төрағасының бірінші орынбасары.
Дидар МӘЛІКҰЛЫ.