Мемлекет басшысы Қасым-Жомарт Тоқаев биылғы жылды «Жұмысшы мамандықтар жылы» деп жариялап, қоғам назарын еңбек адамдарының рөлі мен мәртебесін арттыруға бағыттады. Президент өз сөзінде: «Еліміздің дамуы алдымен адал еңбектің, кәсіби шеберліктің және нақты істің нәтижесіне байланысты» деп атап өткен болатын.
Шын мәнінде, өндіріс пен тұрмыс саласының тұрақты жұмысы өз ісін жетік меңгерген, жауапкершілігі жоғары мамандардың еңбегімен тікелей байланысты. Солардың бірі – «Алматыгазсервис-холдинг» АҚ-ның Боралдай кенті ауылішілік және үйіші газ құрылғыларына қызмет көрсету бөлімінің учаскелік шебері Алмас Өмірәлиев.
Өз ісінің нағыз шебері саналатын Алмас Несіпбайұлы 1991 жылы, 13 мамырда Алматы облысы, Райымбек ауданы, Талас ауылында көпбалалы отбасында дүниеге келген. Әкесі Несіпбай Өмірәліұлы мен анасы Зәбира Мекенқызы екі ұл мен бес қызды тәрбиелеп, өмірге қанат қақтырды. Ал біз сөз етіп отырған Алмас – осы шаңырақтың кенжесі. Оның аға-әпкелері бүгінгі таңда өз мамандықтарының білікті мамандары атанып отыр. Мәселен, ағасы құрылыс саласының шебері болса, әпкелері – ұлт келбетіне айналған ұлағатты ұстаздар.
Алмас бала кезінен әкесінен қолөнер мен ағаш ұсталығын үйреніп, еңбекке ерте араласқан. Оның осы қасиеттері болашақ мамандығын таңдауда да үлкен рөл атқарды. Мектеп табалдырығын Шоқан Уалиханов атындағы орта мектепте аттап, үлгілі оқушы атанды. Әсіресе, география мен әдебиет пәндерін ерекше сүйіп оқып, сыныптастары мен ұстаздарының сүйіспеншілігіне бөленді. 2007 жылы мектепті үздік аяқтап, Алматы индустриалды колледжінің «логистика» мамандығына оқуға түсті. Мұнда Алмас техникалық және ұйымдастырушылық бағыттағы білімін жетілдіріп, алғашқы кәсіби машықтарын меңгерді. 2011 жылы білімін жалғастыру мақсатында Еуразия техникалық университетінің «техник-тасымалдауды ұйымдастыру» мамандығына қабылданып, аталмыш оқу ордасын 2013 жылы тәмамдады. Студент кезінде-ақ үйішілік газ құрылғыларын тексеру ісіне қызығып, сол сала мамандарынан тәжірибе жинады. Білім мен шеберлігін ұштастырған ол 2015 жылы өз мамандығы бойынша Алматы автомеханикалық колледжінде студенттерге дәріс беріп, ұстаздық етті. Бұл оған өз білімін өзгелермен бөлісуге, жас мамандарды тәрбиелеуге бағытталған уақыт болды. Ал алғашқы еңбек жолын 2016 жылы қазіргі жұмыс орны «Алматыгазсервис-холдинг» АҚ Боралдай кентінде слесарь ретінде бастады. Оның бұл бағытта жұмыс істеуіне қызығушылығын оятып, өз тәжірибесімен бөліскен аға буын өкілі, газ саласының шебері Сағат Жұманұлы еді.
Еңбек өтілі мен біліктілігі толысқан Алмас Өмірәлиев 2016-2020 жылдары Боралдай кентінде коммерциялық нысандардың үйіші газ құбырларын тексеріп, тәжірибе жинақтады. 2023 жылдың желтоқсан айында апаттық қызметке ауысып, бір жарым жыл көлемінде қызмет етті. 2024 жылдың мамыр айынан бастап жауапкершілігі мен тәжірибесіне сай учаскелік шебер қызметіне көтерілді.
– Көп компанияда жалақының аздығы мен тұрақсыздығы жұмыс істеуге кедергі болады. Мен адал еңбектенемін деп, осы жұмысты таңдаған болатынмын. Бала кезден көппен араласып, ортада ашық болғандықтан, халықпен тығыз жұмыс істеген ұнайды. Әр жылыту маусымында жоспарлы тексеріс бір рет жүріп отырады. Сол кезде ауылдың газ тұтынушы тұрғындарының қызметіне сапалы жұмыс істеп, алғыс алған керемет сезім. Біздің негізгі мақсатамыз – қылышын сүйреткен қыстан елді жылумен қамтып, апатсыз аман-есен алып шығу. Боралдай кентінде 9 жыл қызмет атқарғанымда, компания тарапынан берілген тапсырманы уақытылы орындап, адал еңбек еттім. Менің қызметімде басшылық тарапынан талай оңды істер жүзеге асып жатқанын айта кеткім келеді. Мәселен, «Алматыгазсервис-холдинг» АҚ Іле бөлімінің басшысы Ержан Камалұлы тағайындалғалы көптеген жүйелі жұмыс атқарылды. Мәселен, халыққа газды апатсыз тұрақты жеткізу мақсатында газ құбырларын ауыстырып, газ жетіспеушілігін шешу жұмыстары жүзеге асты, – деді Алмас Өмірәлиев.
Қазіргі таңда Боралдай кентінде ауылішілік және үйішілік газ құрылғылары бойынша 17 мыңға жуық тұтынушы жеке үйлерге және 1500-дей коммерциялық тұтынушыға 13 слесарь тәулік бойына 4 кезекшілікпен жұмыс істейді. Алмас Несіпбайұлының айтуынша, компания тарапынан үнемі қолдау көрсетіліп, әрбір жұмысшыға кәсіби біліктігін жетілдіруге мүмкіндік беріліп отырады. Нақтырақ айтқанда компания өз қызметкерлеріне Германия, Белоруссия секілді шет мемлекеттерде және еліміздегі Каспий университетінде магистратурада оқытып, білім жетілдіруге қолдау көрсетеді.
– Заман талабына сай кез келген нәрсе цифрландырылуда. Сол сияқты біздің салада да жаңа технологиялар қолданысқа енуде. Компания президенті Ерлан Мұратұлының бастамасымен алыстан диспетчерлік басқару сияқты жаңашылдық енгізіліп жатыр. Ұжымымыз әрдайым жас мамандарды қабылдауға ашық. Өзімнің білгенімді оларға үйретуге әрқашан дайынмын, – деді кейіпкеріміз.
Алмас Несіпбайұлы жұмыстан тыс уақытта әріптестерімен бас қосып, футбол, үстел теннисімен шұғылданғанды ұнатады. Сондай-ақ бұл спорт түрлерінен компания ұйымдастырған жарыстарға да қатысып, топ жарған. Қаншама жылдық еңбек жолында біраз жетістікке жетіп, көпке үлгі болды. Еңбегі, кәсіби шеберлігі, адал және жоғары деңгейдегі жұмысы, белсенділігі үшін Алғыс хаттар иеленді. Сондай-ақ «Алматыгазсервис-холдинг» АҚ және Іле учаскесінің әкімшілігі атынан абоненттермен жұмыстағы жоғары тиімділік, талаптарға мұқият қарау, міндеттерді сапалы әрі сауатты шешу дағдылары бойынша ризашылыққа бөленді.
Алмас Өмірәлиевтің отбасылық өміріне тоқталатын болсақ, ол Назерке есімді арумен 2017 жылы отау құрған. Бүгінде екеуі үш қызды тәрбиелеп отыр. Отбасындағы жауапкершілікті жоғары қоятын Алмас мырза жұмыста да сол тәртіпті ұстанады. Әке ретінде балаларының болашағына алаңдап, олардың қауіпсіздігі мен келешегіне мән береді. Ол бұл ұстанымды кәсіби өмірінде де қаперінде ұстайды. Сондықтан күздің соңына қарай жылу маусымы басталған тұста тұрғындардың қауіпсіздігі үшін ескерту мен түсіндіру жұмыстарын ерекше назарға алады.
Күз мезгілі – газ тұтынушылары үшін ең қауіпті әрі жауапты кезеңдердің бірі. Табиғи газ тұтынушылары шарт бойынша үйіші газ құрылғыларын жоспарлы профилактикалық тексерістен жылына бір мәрте өтуі тиіс. «Алматыгазсервис-холдинг» АҚ Боралдай кенті ауылішілік және үйішілік газ құрылғыларына қызмет көрсету бөлімінің учаскелік шебері Алмас Өмірәлиевтің айтуынша, жылыту маусымы басталған кезде тұрғындардың көпшілігі мұржалардың жағдайына немқұрайлық танытады. Оқыс оқиғалардың 70 пайызы осыдан болады екен.
– Көп үйлерде мұржалардың тарту күші азайып кетеді. Ұзақ уақыт пайдаланылған соң олар бітеліп, ауа айналымы нашарлайды. Мұндай жағдайда иіс газының жиналып қалу қаупі жоғары. Сондықтан тұрғындарға мұржаларды уақытылы тазалап, ескірген жерлерін ауыстырып, арнайы мамандарға тексертіп отыруды ұсынамыз, – дейді ол. Маманның сөзінше, газ қондырғылары орнатылған бөлмелерде міндетті түрде табиғи жарық түсетін терезе және жоғарғы бөлігінде желдету құрылғысы болуы шарт. Бұл – иіс газының сыртқа шығуын қамтамасыз ететін негізгі қауіпсіздік талабы. Кей ауылдық жерлерде ескі пештер мен жеке шығарылмаған қазандықтар жиі кездеседі. Егер мұржа тартпайтын болса, бұл адам өміріне тікелей қатер төндіреді. Осы және басқа да жағдайлардың алдын алу үшін біз тұрақты түрде ескертулер мен түсіндіру жұмыстарын жүргізіп келеміз, – деп Алмас жұмыс барысын да сөз етті.
Байқағанымыздай, Алмас Несіпбайұлының өмір жолы адал еңбектің, табандылық пен кәсіби шеберліктің айқын көрінісі. Ол өз мамандығына деген сүйіспеншілігі мен жауапкершілігінің арқасында еңбек ұжымында сыйлы, беделді маманға айналды. Қызметке деген ізденісі мен адалдығы жастарға сабақ болары анық. Біз Алмас Несіпбайұлына еңбегіне табыс, отбасына амандық пен қуаныш тілейміз. Халыққа қызмет етудегі абыройы арта берсін!
Әділет ЖАЛҒАСБЕКҰЛЫ