Соңғы жылдары ауданымыз спорт саласы бойынша алдыңғы қатарларға шығып, аудандық жарыстардан бастап, халықаралық додаларда жақсы нәтиже көрсетуде. Бұл, әрине бірінші кезекте осы салаға қызығушылығы жоғары жаттықтырушылар мен спортшылардың қажырлы еңбегінің арқасы.
Бүгінде ауданымызда қай спорт түрі болса да өзінің мықтылығын көрсетіп, алғашқы орындардың медалін арқалаған азаматтарымыз бар. Ең қызығы олардың қатарында тек жастарымз ғана емес, сондай-ақ қарияларымыз да бар. Солардың бірі – 70 жастан асқан Жандосов ауылының тұрғыны, спортты өмірінің айнымас серігі еткен, суда жүзудің майталманы Ермек Ельгундиев.
Ермек ағамыз жүзумен үзбей шұғылданып жүргеніне 15 жылдан асыпты. Сол уақыттан бері ол әртүрлі деңгейдегі талай жарыстарға қатысып, көптеген жетістікке қол жеткізіп, ауданымыздың атын шығарып келеді. Түрлі жарыста топ жарып жүрген қария жақында тағы бір ауқымды сайыстан жеңіспен оралды.
Нақтырақ айтқанда, 16-17 желтоқсан аралығында елімізде «Мастерлер» санатындағы спорттық жүзуден Қазақстан Республикасының алтыншы ашық чемпионаты өткен болатын. Алматы қаласында болған жарысқа ТМД елдері мен Ресей мемлекетінен 25-80 жас аралығындағы жүзу спортының майталмандары жиналып, бақ сынасты.
Байрақты бәсекеде аудан және облыс намысын қорғаған Ермек Ельгундиев 70 және 74 жас аралығында 100 метрлік еркін жүзуде қарсыластарын шаң қаптырып, жеңімпаз атанып, алтын медальді қанжығасына байлады. Сондай-ақ брасс әдісімен жүзуден және еркін жүзуден 50 метрлік жарыста екінші орынды иеленіп, үздіктердің қатарынан көрінді.
– Ауданымыз бен облысымыздың атынан жарыстарға қатысып жүргеніме біраз болды. Жалпы спортқа дене дайындығынан бөлек психологиялық әзірлік пен денсаулықтың дұрыс болуы өте маңызды. Сосын алған бетіңнен қайтпайтын қайсар болуың керек. Жүзумен кәсіби түрде кеш айналыса бастасам да оған деген құлшынысымның арқасында біраз жетістіктерге жеттім. Барлық жарысқа Қаскелең қаласындағы «Дельфин» спорт кешенінде дайындаламын. Осы ретте маған әрқашанда қолдау көрсететін аталмыш кешеннің басшылығы мен ұжымына және аудандық мәдениет, тілдерді дамытуғ дене шынықтыру және спорт бөліміне алғысымды білдіргім келеді, – дейді Ермек Ельгундиев.
Бұл жерде тағы бір айта кетерлігі, Алматы облыстық жүзу федерациясы қарияның жарыстардан қалмай, жақсы нәтиже көрсетіп жүргенін жоғары бағалап,Қарасай ауданының мен Жандосов ауылдық округінің әкімдіктерін арнайы Алғыс хатпен марапаттаған.
Ақтоты МЫРЗАБЕКҚЫЗЫ.