Қазіргі таңда, мүмкіндігі шектеулі азаматтардың денсаулығын нығайту мақсатында, ауданымызда әртүрлі іс-шаралар ұйымдастырылуда. Мәселен, жуырда Қаскелең қаласындағы «Қарасай батыр» спорт кешенінде Наурыз мейрамына орай мүгедек жандар арасында ашық турнир өтті. Жиынды аудандық спорт және дене шынықтыру бөлімінің басшысы Серік Қамзанов ашып, барлығын төл мерекемен құттықтады.
Бұл сайысқа біздің ауданнан бөлек, Талғар мен Жамбыл аудандарынан және Алматы қаласынан спортшылар келіп, бақ сынасқан. Спорттық іс-шараға 90-ға жуық азамат қатысып, олар гамбол, шахмат, дойбы және тоғызқұмалақ ойындарында бәсекеге түскен. Топтық есеп бойынша барлығынан озат шығып, Талғар ауданының командасы алғашқы орынды қанжығасына байлады. Ал, 2-ші орынды біздің аудан жеңіп алса, 3-ші орын Алматы қаласының спортшыларына бұйырды. Бұдан бөлек, жарыс алаңында өзін жақсы көрсеткен азаматтарға ұйымдастырушылар, атап айтқанда, «Жігер-М» және «Движу сердцем» мүгедектер қоғамдық бірлестіктері арнайы сыйлықтарын табыстап, мерейлерін үстем қылды. Сонымен қатар, турнир аяқталғаннан кейін, сайыс қатысушыларына мерекелік дастархан да жайылды.
Бақдәулет ТАЛИПОВ.