Қазіргі таңда ерекше спорттың бір түрі саналатын «street workout»-пен шұғылданушылар қарасы қалың. Еліміздің әрбір өңірінде ашылып жатқан тың спорт біздің ауданда да құлашын кеңге жаюда. Осы аптаның сейсенбісі күні Іргелі ауылдық округіне қарасты Көксай ауылында да жаңа «Street WorkOut» спорт алаңшасының ашылу салтанаты өтіп, тұрғындарды қуанышқа кенелтті. Заманауи үлгіде жабдықталған алаңының ашылуына округ әкімі Абылай Ысқақов қатысты.
Ашылу салтанатында Іргелі әкімі ардагерлер кеңесінің төрағасы Төлеу Түйтебаевпен бірге жаңа нысанның ашылуымен құттықтап, оның лентасын салтанатты түрде қиды. Сондай-ақ, салтанатқа орай ұйымдастырылған «Турник и брусья» жарысының жеңімпаздарын дипломдармен марапаттады.
Айта кетейік, спортты серік еткен жастарға арналған заманауи алаңның құрылыс жұмыстары ағымдағы жылдың қазан айында басталған болатын. Құрылысын «Кенженова» ЖК мердігері жүргізген алаңға бюджеттен 1 млн 80 мың теңге бөлінген. Мұнда балалардың және жеткіншектердің дене шынықтырумен айналасуына арналған әртүрлі темірден жасалған спорттық құрылғылар (өрмелеуіш, турниктер) бар. Бұған қоса оның екінші бөлігінде кішкентай балаларға арналған ойын алаңы орналасқан.
Ақтоты МЫРЗАБЕКҚЫЗЫ.