Биыл Қазақстан Республикасының Қарулы Күштерінің құрылғанына – 27 жыл. 1992 жылдың 7 мамырында Президент Жарлығымен Қазақстан Респуб-ликасының айбынды әскері құрылған болатын. Осы аптаның сейсенбі күнінде «Атамекен» музейінде Отанды қадірлейтін, оның тарихын құрметтейтін, ерлік пен жауынгерлік күшке ие нағыз ерлердің мерекесі – Отан қорғаушылар күніне орай іс-шара өтті. Оған аудан әкімі Жандарбек Далабаев, ауған соғысының ардагерлері, құқық қорғау органдарының өкілдері, бөлім басшылары мен жетекші мамандар қатысты.
Салтанатты жиында аудан басшысы Жандарбек Ермекұлы сөз алып, көпшілікті мерекемен құттықтады.
– Отан қорғаушылар күні – еліміздегі барлық буын өкілдерінің басын біріктіретін мейрам. Біз Отанымыздың тарихындағы ерлікке толы кезеңдерді әрдайым қастер тұтып, батыр әкелеріміз бен қаһарман аталарымыздың жанқиярлық ерлігін мәңгілік есте сақтайтын боламыз. Сонымен қатар, бүгінде тыныштық сақшысы болып, елдегі бейбіт өмірдің күзетінде тұрған азаматтарымызға құрметіміз шексіз. Сондықтан, сарбаздар, сіздердің ел мен жерге деген сүйіспеншіліктеріңіз, бойларыңыздағы патриоттық рух бүгінгі өсіп келе жатқан жастарға үлкен тәрбие, өнеге! – деді аудан әкімі өз сөзінде.
Мұнан кейін аудан әкімі ауданымыздың өсіп-өркендеуіне үлестерін қосып жүргені, қоғамдық тәртіпті сақтау, азаматтардың қауіпсіздігін қорғау міндетін абыройлы атқарғаны үшін бір топ азаматты марапаттады.
Атап айтар болсақ, ауған соғысының ардагері Қанатжан Нұрелов (суретте), аудандық Қорғаныс істері жөніндегі бөлім бастығы, подполковник Нұрбол Жұмашхан, аудандық экономика және бюджеттік жоспарлау бөлімінің бас маманы Дархан Борибаевқа ауданымыздың өркендеуі жолында атқарып отырған белсенді қызметі үшін Құрмет грамотасын тапсырды. Сондай-ақ, ауған соғысының ардагері Ильхан Сайфуллаұлы, аудандық поли-цияның жедел уәкілі, полиция капитаны Думан Сайранбек, дене шынықтыру және спорт бөлімінің бас маманы Нұрлан Жұманов, халықты жұмыспен қамту орталығының бас маманы Абзал Нұсқабай, Жаңашамалған ауылдық округі әкімі аппаратының жетекші маманы Нұрлан Әзімжанов пен Ұмтыл ауылдық округі әкімі аппаратының бас маманы Дәулет Омаровқа Алғыс хат табыстады.
Мерейлі басқосудың соңы мерекелік концертпен жалғасын тапты. Концерт барысында аудандық Мәдениет үйінің әншілері патриоттық рухты көтеретін әндер шырқап, жиналғандарға тамаша көңіл-күй сыйлады.
Ақтоты МЫРЗАБЕКҚЫЗЫ.