Аптаның соңғы күні ауданымыздың орталығы Қаскелең қаласында орналасқан Сулейман Демирел атындағы университетте жасөспірімдер арасында ағылшын тілінен «Knowledge is Power» олимпиадасы өтті. Ауданымыздағы «CES for You» халықаралық тіл орталығы ұйымдастырған бұл жарыстың мақсаты – талантты балаларға әлеуметтік қолдау көрсетіп, қазақ жастарының халықаралық дәрежеде білім алуына жағдай жасау. Олимпиаданы «CES for You» халықаралық тіл орталығының директоры Айгүл Тәңірбергенова ашып, байқаудың мақсаты мен міндеттерін айта келе, сайыскерлерге сәттілік тіледі. Сондай-ақ, Нью-Йорк қаласынан келген сарапшы, мисс Симона сөйлеп, жарысқа комиссия мүшесі ретінде шақырылып, қазақтың қонақжайлылығын көрсеткендері үшін алғысын білдірді, үміткерлерге сәттілік пен жеңіс тіледі.
Биыл төртінші рет ұйымдастырылып отырған олимпиадаға аталмыш тілдер орталығының 13 филиалынан іріктеліп өткен 130 бала қатысты. Екі кезеннен тұратын олимпиадада балалар 3 жас аралығында Kids (8-12 жас), Teens (12-15 жас), Twens (15-17 жас) деңгейі бойынша сынға түсті. Ал, балалардың білімін тексеретін комиссия мүшелерінің құрамында «CES for You» орталығының мұғалімдерінен бөлек Франция, Англия, Америка елдерінен келген арнайы сарапшылар да болды. Білім додасы барысында талапкерлерге арналған тапсырмалар қарапайым деңгейден күрделіліге қарай құрастырылып, шет тілін меңгеруде барлық қабілетті дамытуға арналған тапсырмалар берілді. Атап айтқанда, тыңдау, сөйлеу, оқу және жазу қабілеттері сараланды. Сайыстың бірінші кезеңінде білімгерлер грамматика (Grammar Lexical) мен жазу (Writing) бойынша шеберліктерін көрсетіп, еркін тақырыпта эссе жазды. Ал, екінші айналымда комиссия мүшелері қойған сұрақтарға жауап беріп, ағылшын тілінен еркін сөйлеу (Speaking) қабілеттіліктерін көрсетті. Сондай-ақ, шара барысында балалардың ойын сергітіп, көңіл-күйлерін көтеру мақсатында ауданымыздың өнерпаз жастарының атсалысуымен көпшіліктің назарына концерттік бағдарлама ұсынылды. Оның барысында «Ұлы дала мұрасы», «Самға, самұрық!», «Золотое руно», «Салют талантов», «Роза обзора» сияқты байқаулардың жүлдегерлері мен лауреаттары ән айтып, би билеп, күй орындап қатысушылар мен көрермендерге көтеріңкі көңіл-күй сыйлады.
Сайыс қорытындысында екі кезеңнен де сүрінбей өтіп, қарсыластарына дес бермеген «CES for You» орталығының оқушысы Абдуллах Жүсіп бас жүлдені жеңіп алды. Оған Ұлыбритания мемлекетіне тегін оқу жолдамасы берілді. Ол жерде жеңімпаз үш апта бойы тіл мектебінде білім алумен қатар, Англияның көрікті жерлерін аралайтын болады. Ал, оның жетекшісі Айғаным Мамановаға 200 мың теңге мен аталмыш мекеменің «The best teacher» номинациясы берілді.
Мұнан бөлек жоғарыда аталған Kids санаты бойынша 1-орынды Айжан Арманова алса, Teens пен Twens санаттары бойынша 1-орын Мөлдір Ералы мен Бауыржан Адаевтың қанжығаларына бұйырды. Соңынан барлық қатысушыларға бағалы сыйлықтар, Алғыс хаттар мен аталмыш орталықта жеңілдікпен оқуға мүмкіндік беретін 5000 теңгелік сертификаттар тапсырылды. Сондай-ақ, оқушылардың білімдерін жетілдіруге үлкен үлес қосқан жетекші ұстаздарға ақшалай сертификаттар табысталды.
Тағы бір атап айтарымыз, осы олимпиаданы ұйымдастырып, жастарға жаңа белестерге жол ашып отырған аталмыш орталық директоры Айгүл Қанатқызы жуырда Қоғамдық наградалар мен атақтар жөніндегі комитет атынан, Қазақстан Республикасының экономикалық қуатын, гүлденуі мен игілігін нығайтуға қосқан жеке үлесі үшін, «Қазақстанның Құрметті азаматы» атағына ұсынылыпты. Аталмыш марапатты салтанатты тапсыру рәсімі 7 шілде күні Нұр-Сұлтан қаласында өтетін болады. Өз ісінде үлкен табыстарға жетіп, білім саласының өркендеуіне үлкен үлесін қосып жүрген Айгүл Тәңірбеноваға денсаулық, еңбегіне жеміс, отбасына бақыт тілейміз!
Ақтоты МЫРЗАБЕКҚЫЗЫ.