Аптаның сейсенбісі күні ауданымыздың орталық кітапханасының ғимаратында Қарасай аудандық ардагерлер ұйымының отырысы өтті. Ардагерлердің алқалы басқосуына Алматы облысы ардагерлер ұйымының төрағасы Ерболат Тұрымбетов, аудан әкімінің орынбасары Айжан Назарбаева және ауданның ардагерлері мен аналар ұйымынан сайланған делегаттар қатысты.
Жиын барысында күн тәртібі бойынша үш мәселе қаралады. Алдымен аудандық ардагерлер ұйымының атқарған жұмыстары туралы есеп тыңдалды. Бұл жайында аталмыш ұйымның осы уақытқа дейін төраға міндетін атқарған Сағат Мәсімақынов баяндады. Мұнан соң есеп-санақ және тексеру комиссиясының құрамы бекітіліп, аудандық ардагерлер ұйымының пленум мүшелері сайланды.
Осылайша жиын облыстық ардагерлер ұйымының төрағасы Ерболат Сапарұлының қатысуымен өткен аудандық ардагерлер ұйымының пленум отырысына ұласты. Пленум мүшелері аудандық ардагерлер ұйымының жаңа төрағасы ретінде бір ауыздан ауданымыздың білім саласына үлкен үлесін қосқан ардагер ұстаз, аталмыш ұйымның төрағасының орынбасары болып жеті жыл еңбек еткен Сағат Ұлтарақұлын лайық деп танып, бір ауыздан қолдады.
Мұнан кейін Ерболат Тұрымбетов сөз алып, аудандық ардагерлер ұйымының жұмысына дән риза екендігін жеткізіп, жаңа төрағаны құттықтап, алдағы жұмысына табыс тіледі. Сонымен қатар, ұйым мүшелер келер жылы облыс бойынша ардагерлер жұмысын белсендету керектігін айтып, алда келе жатқан сайлауға атсалысуға шақырды. Аудан әкімінің орынбасары Айжан Нұрділдақызы да бірталай жыл бірге жұмыс жасаған Сағат Мәсімақыновтың жақсы қасиеттерін тілге тиек етіп, оның өмірге деген адалдығы мен қызметке деген жауапкершілігі бәрімізге үлгі боларлықтай екенін айтып өтті.
Арнайы шақырылған қонақтар сөйлеп болғаннан кейін, жиынға қатысқан ауданымыздың құрметті ардагерлері сөз алып, жаңа төрағаны құттықтап, алдағы уақытта облыстың, ауданның атқарар барлық жұмыстарына белсенді түрде атсалысатындарын жеткізді.
Жиын соңында облыстық ардагерлер ұйымының төрағасы кітапхана ғимаратында орналасқан ардагерлер ұйымының бөлмесіне барып, Сағат Ұлтарақұлын салтанатты түрде төраға орнына отырғызды.
Ақтоты МЫРЗАБЕКҚЫЗЫ.