Жастар жылына орай, аудандық кітапхананың ұйымдастыруымен, ақындармен кездесу кеші өтіп, оған Қаскелең мәдениет колледжінің, «Жәрдем» медициналық колледжінің, «Қарасай Аяжан» медициналық колледжінің студенттері мен жастар қатысты. Кеш барысында «Елбасы еңбектері», «Бір ел, бір кітап», «Электронды кітаптар», «Біз бақытты баламыз» атты көрмелер ұйымдастырылып, таныстырылды. Шара кезінде жастар оқуға тиісті 50 кітаптың тізімі жазылған жадынамалар таратылды. Жастар жылына байланысты, кешке жастарға айтар ұлағатты, ғибратты сөздері бар, киелі поэзия әлемінде өзіндік сыр, бояу, ажары бар, оқырман қауымын елең еткізіп, жырмен тербеп жүрген ақындарымыз – Серік Қалиев пен Қуаныш Қолхаев шақырылды.
Сонымен қатар, жастарымызға ғибратты жол сілтеп жүрген ауданның Құрметті азаматы, ұлағатты ұстаз, аудандық «Қазақ тілі» қоғамының төрайымы Шара Қанатқұлқызы мен ұлағатты ұстаз, еңбек ардагері Сәуле Бегалиқызы қатысты.
Кездесу барысында ақындарымыз жастарға ой салатын өлеңдерін оқыды. Қаскелең қаласының жалынды жастары да сөз алып, өздерінің ойларын білдірді. Сондай-ақ, аудандық мәдениет үйінің әншісі Ж. Есжанова өнер көрсетті. Кешті аудандық кітапхана директоры У.Өтеева қорытындылады.
Өз тілшіміз.