көз сүйсінтіп, көңіл қуантады

Тәуелсіз еліміз тәй-тәй басқаннан-ақ Президентіміз Нұрсұлтан Назарбаев әлеуметтің әлеуетін көтеруге бар жақсылықты жасап келеді. Оның ішінде, еліміздің барлық аймақтарының бүлдіршіндерін толықтай мектепке дейінгі мекемелермен қамтамасыз етуді басты назарына алды. «Ел боламын десең, бесігіңді түзе» дегендей, осындай мекемелердің қатарын көбейтемін деуші кәсіпкерлерге мемлекет тарапынан қолдаулар да қарастырылған. Соның бірі мемлекеттік-жекеменшік серіктестік арқылы жаңа нысандарды ашу. Осыған орай ауданымызда алғашқы 150 орындық «Қарлығаш» балабақшасы бүгінде сыңғырлаған сәбидің күлкісіне толы жылы ұяға айналған. Қаскелең қаласындағы «Қарлығыш» тұрғын үй кешенімен іргелес орналасқан көз сүйсінтіп, көңіл қуантатын сәні мен сәулеті жарасқан қосқабатты мектепке дейінгі мекемеде білім мен тәрбие алуы үшін барлық жағдай жасалған. Қазіргі таңда әрбір затқа талғаммен қарайтын уақытқа да жеттік. Әсіресе, мектепте дейінгі мекеменің тамақтануы мен жабдық сапасына үлкен мән береміз, оған тағы үйрету мүмкіндігі мен жан-жақтылығы болуын қосыңыз.

Жаңадан пайдалануға берілген балабақшаның басты ерекшелігі – бүлдіршіндерге жайлы болуымен қатар, ата-аналардың өз балаларын үнемі қадағалап отыруға мүмкіндік жасалуында. Яғни, ата-аналар балалар мекемесінің бөлмелері мен ауласында орнатылған бейнекамералар арқылы өз смартфондарынан сәбиінің немен айналысатынын арнайы ақылы қосымшасы арқылы толықтай бейнекөрініс арқылы бақылай алады.
Бұл балабақша аумағында үлгілік мектепке дейінгі мекемелердегідей балалардың ойнауына, серуендеуіне, спортпен шұғылдануына арналған топтық алаңшалар мен демалыс орны да бар. Креативті әрлеулер мен заман талабына сай орнатылған қажеттіліктердің барлығы да бүлдіршіндер үшін. Сондай-ақ, мұнда білім беру стандартына сай балалардың интеллектуалды дамуына арналған оқу бөлмелері және музыкалық, спорттық, хореографиялық, ертеңгіліктер өткізуге арналған мәжіліс залдары жұмыс істейді.
Еліміздің отансүйгіш жастарын тәрбиелеуде үлкен жұмыс атқарып отырған аталмыш мекеменің меңгерушісі Салтанат Рашитқызы әрбір бүлдіршінге ерекше көңіл бөлінетінін де тілге тиек етті.
– Жалпы, балабақша ата-аналарды қабылдау бөлмесінен, балалардың ойын және жатын бөлмелерінен және асханадан тұрады. Мұнда 25 қызметкер жұмыс істейді. Тағы бір айта кететін жайт, әр топтың төсектері мен орындықтары бүлдіршіндердің жастарына байланысты арнайы тапсырыспен бір қабатты болып жасалынған. Біздің ғимараттың іші балалардың психологиясын зерттей отыра ашық түстермен әрленген. Ал, ойыншықтардың барлығы балалар денсаулығына қауіпсіз, арнайы сертификатталған. Бұның барлығы болашақта білімді, дені сау саламатты ұрпақ тәрбиелеудегі алғы шарттардың бірі, – деген басшы сөзінен өз ісіне аса мұқияттылық пен ықтияттылықты аңғардық.
Сонымен қатар, мұнда физиокабинет және массаж бөлмесі, психолог пен логопед кабинеттері де орналасқан. Медициналық аймағында мектепке дейінгі ұйымдардан талап етілетін санитарлық нормалардың барлығы ұйымдастырылған. Балалардың денсаулығына аса мән беретін балабақша, ауа-райының құбылмалы кезеңдерінде вирустардан сақтану үшін күнделікті ас мәзіріне итмұрыннан жасалған шайды беруді де енгізген екен. Сондай-ақ, тұмаудың белгілері байқалған жағдайда бүлдіршіндерге медбике дәрілік-сұйықтық арқылы еммен демалу процедурасын жасайды, яғни, ингаляция.
Бизнестің әлеуметтік жауапкершілігі аясында ашылып отырған балабақша құрылысын «Фирма Еламан» ЖШС құрылыс компаниясының басшысы Ерғали Миразов жүргізген. Мердігер компания алдын ала бар ыңғайлылықты ойластырып, тамақ дайындайтын асхананы жатын бөлмелерден мүлдем бөлек етіп салдыртыпты. Ал, тамақ тарату үшін әр топқа жеке ас бөлмелері де қарастырылған. Бөлек орналасқан асханасының тап-таза болуымен қатар, етке, жеміс-жидекке, құрғақ асқа арналған жеке қоймалар да бар. Сондай-ақ, төсек жабдықтары да жеке кір жуу орнында жуылады. Ата-аналарға арнайы бар жағдайды қарастырған мекеменің қызметкерлері үшін де жұмыс істеуіне ыңғайлы.
Болашақтың қақпасы әрбір бақша табалдырығын аттаған бүлдіршіндердің қадамдарында ертеңге деген нық сенім, жүректерінде патриоттық сезімдері жалындаған ұлт ұрпағын тәрбиелейтін білім мен тәрбие беретін алтын қақпа болуы тиіс.
Қай жағынан болса да мекеме ұжымы баланың бөбекжайда білімді болуымен қатар, тәлімді тәрбие, денінің сау болуын басты назарға алған. Сондықтан Қаскелеңдегі «Қарлығаш» балабақшасына балаңызды еш алаңсыз әкелуіңізге болады.
Балапандар үшін барлық жағдай қарастырылған балабақшаның болашағы жарқын болатынына сеніміміз мол. Қадамын адымдай басқан бөбекжай ұжымына алдағы уақытта сәттілік тілейміз!
Бұрым ОРЫНБАСАР.