Ауданымыздағы қоғамдық ұйымдардың ішінде ардагерлер кеңесінің орны айрықша. Өйткені, оның төрағасы Сайлаубек Қыдыралиевтің басшылығымен жүзеге асып жатқан жұмыстарының маңызы өте зор. Ел алдында жіті назарда жүретін ардагерлердің қоғамдағы, әсіресе, жастар тәрбиесінде атқарар істері де аз емес. Сондықтан да аға ұрпақ өкілдерінің басын қосатын ұйымдардың жұмыс нәтижелерін талқылаудың да қажет екені белгілі. Осындай мақсатпен жақында ауданымызға ҚР ардагерлер ұйымы төрағасының бірінші орынбасары Өмірзақ Озғанбаев пен осы ұйымға қарасты Алматы облысы бойынша ардагерлер кеңесінің төрағасы Ермек Келемсейіт арнайы келді. Олар ең алдымен Сайлаубек Қасенбайұлы басқарып отырған ардагерлер ұйымының атқарып жатқан жұмыстарымен танысып, өзара тәжірибе алмасу жағына жан-жақты назар аударды. Сондай-ақ, қадірлі қонақтар аудандық Қоғамдық кеңестің төрағасы Сағат Мәсімақыновтың бастауымен, Қарасай жерінің құрылысы ерекше бой көтерген жерлерін аралап, тамашалады. «Батыр бабалар» мемориалына барып, ондағы ежелгі сақ дәуірінен бастап, еліміз тәуелсіздік алғанға дейінгі жанкешті, ержүрек батырлардың тарихына ден қойды. Одан кейін экскурсия кезегі «Анаға құрмет» музейінде жалғасты. Қазақ жерінде қаһарман қыздардың да рөлі ерекше екені бәрімізге белгілі. Солардың өшпес ерлігі мен өнегелі өмірбаяндарынан сыр шертер мұрағаттар ардагерлерімізді ерекше әсерге қалдырды. Тіпті, Өмірзақ Озғанбайұлы соғыс кезіндегі әйелдер қауымының атқарған ерен еңбектері жайлы айтып, қазақ тарихында сақталған аналар бейнесін сөзбен суреттеп жеткізді. Әңгіме барысында осы мәдени орынның ашылуына да септігін тигізген орталықтың директоры Бақыт Шпекбаеваға өз алғысын білдірді. Мұнан кейін ардагерлер сәулеті мен сәні салтанат құрып тұрған «Атамекен» тарихи-мәдени орталығына келді. Елбасымыздың өмірі, атқарған еңбектері мен саяси сара жолынан сыр шертетін тарихи ғимарат қонақтарды керемет күйге бөледі. Мекеме қызметкерлері ол кісілерге ондағы барлық жәдігерлерді көрсетіп, аралатты. Келесі кезекте ардагерлер дөңгелек үстелде алған әсерлерімен бөлісіп, өзара пікір алмасты. Іс-сапарларын осындай жоғары көңіл-күймен аяқтаған ардагерлер ұйымының басшылары жоспарға сай мақсат-міндеттерін орындаған, нәтижесі жоғары аудандық ардагерлер кеңесінің жұмысына оң бағаларын берді.
Дидар МӘЛІКҰЛЫ.