Тасашыда талай нәтижелі жұмыстар атқарылуда

Кеген ауданының аумағында Тасашы ауылы бар. Сонау өткен ғасырда Қазақ КСР-нің 50 жылдығы атындағы тәжірибе шаруашылығы құрылып, Тасашы ауылының іргетасы қаланған екен. Аталған шаруашылықта еңбек еткен жандар, ауыл тұрғындары өткен жылдары ауыл іргетасының қаланғанының жарты ғасырлық мерейлі тойын атап өтті. Дәл осы тұста ауылдағы Мәдениет үйі күрделі жөндеуден өткізіліп, игі басқосу сол жаңғырып, жайнаған өнер ордасында өткізілген. Сол мерейлі тойға тәжірибе шаруашылығын басқарған білікті басшы, жетелі жетекші, айтулы елағасы Жұмахан Сокуровтың өзі қатысып еді. Тасашы ауылы десе, өз тұсында СОКП-ның ХХVІІ сьезіне делегаты, Қазақ КСР Жоғары Кеңесінің депутаты, 3 орден, бірнеше медалдың иеcі болған Бақаш Аманхановадай еңбеккер ананың, аға шопан, Социалистік Еңбек Ері Әлдибек Бақбергеновтың бейнесі елестейді.
Тасашы ауылдық округіне Ақтасты, Жаңа Тасашы, Тасашы, Сарыкөл атты бірнеше шағын ауылдар қарайды. Ақтасты ауылы десе, ақ тасты таудың етегіне орналасқан ұядай ғана ауыл көз алдымызға келеді. Ақтасты десе, сонау шаруашылықтар тұсында бес бірдей Социалистік Еңбек Ері шыққан ауыл ойымызға оралады. Рас, Сейдахмет Қорғасбаев, Сусынбай Қалмақбаев, Молдақын Мүсірәлиев, Жұмахан Қорғанбаев, Құрманәлі Төлебаев секілді Еңбек Ерлерінің есімдері ешқашан ұмытылмақ емес. Олардың жарқын бейнелері ауылдық Мәдениет үйінің төрінен орын алған. Аталған округ аумағында мыңға тарта адам тұрады. Мұнда да сол төрт түлік малымен берекелерін кіргізіп, ырыстарын арттырып жүрген қарапайым халық өмір сүріп келеді. Қысында қалың қар түсетін, аязы бет қарып жататын, жазы жаңбырлы келетін өңірде 14 мың қой-ешкі, 2500 бас іріқара, 1920 бас жылқы өсіріледі. Биылғы көктем маусымында 7000 бас саулық төлдетіліп, әр жүзінен жүзден қозы ілесті. Құлын мен бұзаудың да жайы жаман емес.
– Біздің округте егістік жердің көлемі аз. Соған қарамастан жұмыс жүргізіп, биыл 300 гектар жерге арпа септік. 74 гектар жерге картоп, 14 гектар жерге көкөніс отырғызылды. Төл алу науқаны, егіс жұмыстары бойынша өз шаруаларын ұтымды жүргізіп отырған Бектұрсын Қазыбеков, Оспанәлі Мәшімбаев, Сағат Байсабаев, Қайрат Мұқанов секілді шаруа қожалықтары жетекшілерін орнымен айтуға болады, – дейді Тасашы ауылдық округінің әкімі, осы ауылдың төл перзенті, еңбекқор азамат Ерболат Төребаев. Ерболат жоғары білімді мал дәрігері. Бұған дейін Тасашы ауылдық ветеринариялық пункттің меңгерушісі болып жемісті еңбек етті. Биылғы жылдың ақпан айында халықтың сайлауы, таңдауы, дауыс беруі арқылы ауылдық округ әкімі болып сайланып, жұмысын бастап жатқан жайы бар. Азаматтың аттаған қадамына сәттілік тіледік.
Жоғарыда сөз еткеніміздей, Тасашы ауылындағы Мәдениет үйі күрделі жөндеуден өткізілді. Көшелері асфальтталып, жарықтандырылды. Енді ауыз су жүйелерін жаңғыртудың қажетті құжаттары жасалуда. Ақтасты ауылының тұрғындары өткен жылы таза ауыз суға қол жеткізді. Биыл көшелері асфальтталып, жарықтандырылатын болады. Округ аумағында 2 орта, 1 бастауыш мектеп жұмыс істейді. Ақтасты ауылында клуб үйі бар. Тасашы ауылындағы фельдшерлік-акушерлік пункттің ғимараты да күрделі жөндеуден өткізіліпті. Ауылдың ажарын ашып тұр. Алдағы жылдары Тасашы орта мектебінің ғимаратына да күрделі жөндеу жұмыстары жүргізіледі. Бұл игілікті шаруаның алғы шарттары жасалып, 1 миллиард теңгеден астам қаражат қарастырылуда. Ауылда бірнеше сауда орындары жұмыс істейді. Игілік Әбдірасыл, Төлеген Болат секілді азаматтар омарташылықпен айналысады. Мәдениет үйінінің ғимаратында ауылдық кітапхана бар. Құшағы түрлі кітапқа толы жайлы бөлмеде Дәурен Ермекбай атты білімді, білікті, түсінік-танымы мол азамат кітапхананың меңгерушісі болып еңбек етеді. Дәурен – Қазақстан Журналистер Одағының мүшесі. Кітапхана ісінің үздігі. Ауылында, ауданда болып жатқан түрлі жағымды жаңалықтарды, жақсылықтарды түрлі-түрлі мерзімді басылымдарда жария етіп отырады.
– Округ аумағындағы Жаңа Тасашы, Сарыкөл шағын ауылдарының да жағдайлары жаман емес. «Ауыл аманаты» бағдарламасы аясында да жүргізіліп жатқан жұмыстар бар. Бірнеше азаматымыздың құжаттарын өткізіп қойдық. Биылғы жылы да жаңа жұмыс орындары ашылады деген сеніміміз мол, – дейді ауыл әкімі Ерболат Төребаев.
Өңірдің толғантар мәселелері бірте-бірте реттеліп, олқы тұстары бүтінделіп келе жатқан мұндағы ел мен жұрт ертеңгі күндеріне үлкен үмітпен қарайды. Тасашының таңы арайлы бола берсін!