Әйтей округінде атап айтарлықтай ауқымды жұмыстар аз емес

Әйтей ауылдық округі бүгінде көркейіп, гүлденіп келе жатқан елді мекендердің бірі. Ауылдың ішінде бірнеше жылда аса маңызды өзгерістер жасалып, тұрғындардың әдеттегі тіршілігі толығымен басқа арнаға бұрылған, халықтың жағдайын жақсарту мақсатында көптеген ауқымды жұмыстар атқарылып жатыр. Мұндағы әлеуметтік ғимараттар жаңарып, ауылдың келбеті келіскен. Жыл өткен сайын шаруасы алға басып, халықтың әлеуеті жақсара түсуде. Округке қарасты бірқатар ауылдарға бетбұрыс жасалған соң, заман талабымен олардың кескін-келбеті сәндене, тұрмыс-тіршілігі әлдене бастады.
Осыдан сегіз жыл бұрын ғана дараланып, бөлініп шыққан Әйтей ауылдық округінің 14136 тұрғыны бар. Аумағына Әйтей, Еңбекші, Құмарал, Сауыншы, Үштерек ауылдары мен Арайлым, Дархан саяжайлары кіретін аталған округтің жалпы жер көлемі 8507 гектарды алып жатыр.
Бүгінде замана көшінен қалыспаған, береке-бірлігі жарасқан іргелі округ тізгінін білікті басшы Жарқын Қатубаев ұстап келеді. Мемлекет басшысы Қ.Тоқаевтың алға қойған келелі міндеттерін жүзеге асыруда аянбай еңбек етіп, ауыл жұртшылығын жүйелі іске жұмылдырып келе жатқан атқарушы билік өкілі – ауыл әкімі мен оның аппарат қызметкерлерінің тындырып отырған жұмыстары ауқымды, алға қойған міндеттері жүйелі.
Осындай жүзеге асырылған игі істер мен халықтың өтініші негізінде көтерілетін өзекті мәселелер әр жылдың басында аудан әкімінің халық алдында есеп беру кездесуінде айтылатыны белгілі. Биылғы жылы да округке қатысты біраз мәселелер талқыланып, ауқымды жұмыстардың жай-жапсары нақтыланды. Жоспарға сәйкес, атқарылған және алға қойылған жұмыстарды төменде атап айтатын боламыз.

Өткен жыл жағымды жаңалықтармен есте қалды

Өткен жылы Әйтей ауылдық округінің аумағында талай жарқын істер атқарылып, оған қарасты елді мекен тұрғындарының тұрмысы жақсара түсті. Мәселен, 2020-2021 оқу жылы қарсаңында мыңдаған шәкіртті қанаттандырған көп жылдық тарихы бар Б.Қосынов атындағы мектептің жаңа ғимараты өз есігін ұстаздар мен оқушыларға айқара ашқан болатын. Бұл нысанның пайдалануға берілуі ұзақ уақыт бойы осы мәселенің шешімінің күтіп жүрген Әйтей округінің тұрғындары үшін ең үлкен қуаныштың бірі болды. 1200 балаға лайықталған үш қабатты ғимараттың құрылыс жұмыстарын мердігер компания «Bi Group» компаниясы жүргізген. Құрылысы 2019 жылы басталған үш қабатты білім ордасы заманауи талаптарға сай салынған. Мектептің алдыңғы жағында үлкен алаңнан бөлек мұғалімдердің автокөліктерін қоюға арналған тұрақ та бар. Ал, ғимараттың артқы жағында оқушылардың денешықтырумен айналысуларына арналған стадион орналасқан. Сондай-ақ, оның аумағында футбол, баскетбол, волейбол ойнайтын кіші алаңы,заманауи мектептің ішкі жағында үлкен спорт залымен қатар, 320 орындық жиынзалы, 200 орындық асханасы бар. Бір сөзбен айтқанда, жаңа мектепте білім алушылар мен ұстаздар үшін барлық жағдай жасалған.
«Жол қадірін жүрген біледі» демекші, «Өңірлерді дамыту» бағдарламасы аясында Әйтей ауылындағы Жамбыл көшесінің екінші бөлігіне және Теректі көшесіне ағымдағы жөндеу жұмысы жүргізілді. Ал, «Жұмыспен қамту жол картасы» бағдарламасы бойынша округте сегіз жоба іске асырылған. Нақтырақ айтар болсақ, өткен жылы Әйтей және Еңбекші ауылдарының су құбырларын ағымдағы жөндеуге бөлінген қаражат толық игеріліп, жұмыстары аяқталды. Округтегі бірқатар аймақтарда электр желілері ретке келтіріліп, Еңбекші ауылында ағымдағы, ал, Құмарал ауылында қайта жаңғырту бойынша жұмыстар атқарылды. Автомобиль жолдарына келсек, Әйтей ауылындағы Жамбыл, Т.Бокин көшелері ағымдағы, Еңбекші ауылындағы Райымбек көшесі орташа жөнделген.
Әйтей ауылдық округіндегі тұрғындарды алаңдатқан жарық мәселесін де жүйеге келтіру біртіндеп іске асуда. Олай деп айтуға Әйтей ауылындағы Жамбыл көшесіне – 56, Қосынов мектебіне апаратын Бәйтерек, Наурыз көшелеріне – 20, Үштерек ауылы мектебінің кіреберісіне – 24 жарық бағаналарының қойылуы негіз болып отыр. Белгілі болғандай, түнгі жарықшамдары алдыңғы кезекте білім мекемелеріне апаратын жолдардың жиектеріне орнатылған. Енді ауыл халқы кешкісін серуендеуде, балалар сабақтан қайтатын уақыттарында жарық көшелерде емін-еркін еш алаңсіз жүреді.
Жоғарыда атап көрсеткен жұмыстардың барлығы өткен жылы шешімін тапқан.

Жүйелі жоспар құрылған

Биыл да аталған округтегі байыпты бастамалар жолға қойылып, тыңғылықты істер жалғасын табады. Ағымдағы жыл әйтейліктерді көп функционалды спорт кешенінің салынуымен қуантады. Былтыр «Самұрық-Қазына» ұлттық әл-ауқат қоры» АҚ-мен келісімшарт жасалып, Әйтей ауылындағы бұл спорт мекемесінің құрылысын 2021 жылы бастау жоспарланып отыр. Заман талабына сай жабдықталатын сауықтыру кешенінде: кіші футбол, волейбол, теннис алаңдары, палуандарға арналған кілем, бокс рингі, трибуналар, үстел теннисі және тағы да басқа қосалқы бөлмелер салынады деп күтілуде.
Иә, ағымдағы жылға қойылған жоспарлардың легі мұнымен аяқталмайды. Округтегі білім мекемелерінің саны тағы бір жаңа ғимаратпен толықпақ. Анығын айтқанда, Үштерек ауылында биыл 600 орындық жаңа орта мектеп бой көтеретін болады. Екі гектар аумаққа салынып жатқан оқу ордасы толық үш қабатты болмақ. Мердігер мекеме «Ақорда» ЖШС-і жүргізіп жатқан мектептің құрылыс жұмыстарын 2022 жылы аяқтауды жоспарлауда.
Ал, «Алматы – Бішкек» күре жолына жақын орналасқан Әйтей ауылына қарасты «Өмірұзақ» тұрғын үй кешенінде 30 га. жер теліміне 2 қабатты 520 пәтерлі «таунхаус» үйлер салынуда. Аталған жобаның 100 «таунхаус» үйінің құрылыстары жүргізіліп, 50 үйдің құрылысы өткен жылы желтоқсан айында аяқталған. Қалған 50 үйдің тұрғызу жұмыстары 2021 жылдың сәуір айында бітеді деп күтілуде. Тұрғын үй кешініндегі инженерлік желілер мен абаттандыру жұмыстары толықтай мамыр айында аяқталмақ.
Мұнан бөлек осы жылы инфрақұрылымды дамыту да назардан тыс қалған жоқ. Әйтей ауылындағы электр желілерін қайта жаңғырту жұмыстары биыл да жалғасын табатын болады. Сауыншы ауылының тұрғындарын көгілдір отынмен қамту жұмыстары биыл жолға қойылды. «Тәуекел-Газ құбыры» жауапкершілігі шектеулі серіктестігі айналысатын газ тарту жұмыстарының қазіргі таңда жобалау-сметалық құжаттамасы әзірленуде. Жоспарға сәйкес, құрылысы сәуір айында басталады.
Сонымен бірге, Құмарал ауылынан Еңбекшіге апаратын облыстық маңызы бар жолға жаяу жүргіншілерге арналған жол жиегі салынады. Бұл күре жол облыстық автомобиль жолдары басқармасына қарайтындықтан, қаражат сол жақтан бөлінді. Аталған жоба бойынша құрылыс жұмыстарын 2021 жылдың екінші жартыжылдығында аяқтау жоспарланған. Көше демекші, «Өңірлерді дамыту» бағдарламасы аясында Әйтей ауылында Байқоңыр көшесіне ағымдағы жөндеу жұмыстары жүргізіледі.
Саламатты өмір салтын насихаттау аясында да жақсы бастама қолға алынбақ. Қолжетімді спортқа мүмкіндіктер беретін «Street Workout» алаңы Әйтей ауылында салынатын болады. Жұмыс жоспарына сәйкес бұл спорттық жабдықтары бар алаң жергілікті тұрғындардың игілігіне осы жылы берілмек.
Жыл өткен сайын бюджеті еселеніп артып отырған ауданымыздың бір ғана округінде ел игілігі үшін атқарылып жатқан жұмыстар легі осындай. Иә, қазіргі халыққа арналған істер ауыз толтырып айтарлықтай, ел еңсесі көтеріліп, әлеуметтің жағдайы жақсарған. Тәуелсіз елдің әр күні осындай болса керек. Егемендік алған жылдармен бірге еңсесін тіктеп келе жатқан ауылдың жақсы жаңалықтары азаймасын!
Бұрым ОРЫНБАСАР.