Мектеп оқушысы кәсіппен айналысып, табыс тауып отыр дегенді естігенде оған әркімнің сенуі екіталай. Десе де бұл мүмкін болатын нәрсе екеніне көзіміз жетті. Ауданымызға қарасты Береке ауылындағы орта мектептің 11 сынып оқушысы Берік Әжімбай мемлекет қолдауына ие болып, бүгінде ат әбзелдерін дайындау ісімен айналысуда. Жасөспірімнің жеке кәсібімен танысу үшін жақында ол тұратын елді мекенге арнайы барып, өнеріне тәнті болдық.
16 жастағы баланың кәсіп ашуына «Тәуелсіздік ұрпақтары» жобасы ықпал еткен. Соның аясында мектеп оқушысы қайтарымсыз грант ретінде 1 млн теңге қаржыға ие болып, отбасылық кәсіпті ілгерілетуге үлес қосқан. Қазіргі таңда Берік шағын ғана шеберханада ертоқымнан бастап, жүген, ноқта, үзеңгі сынды атқа қажетті жабдықтардың бәрін дайындаумен айналысады. Соның ішінде ертоқымы көптің сұранысына ие. Олардың жалпы 30-40 түрі бар болса, тапсырысқа байланысты кез келгенін әзірлеуге машықтанған.
Атадан балаға мирас болып келген бұл кәсіптің дамуына Беріктің әкесі Мадияр Нұрбеков және басқа да ағайынды бауырлары қолдау білдіреді. Бір жұмысты жүйелі түрде жүргізіп жатқаны олардың қанында бар екенін Берік өз сөзінде тілге тиек етті.
– Бұл кәсіппен айналысу біздің қанымызда бар. Мен ес білгелі әкем бұл өнерді жанына серік еткен. Ал әкеме дейін менің аталарым осы жолда еңбектенген жандар болыпты. Сондықтан әулетіміз үшін бұл таңсық жұмыс емес. Қазіргі уақытта еліміздің әр түкпірінен тапсырыс көп түседі. Ертоқым дайындағанда алдымен сапасына мән береміз. Содан болар біз ел бойынша мықты шеберлердің қатарындамыз, – дейді мектеп оқушысы Берік Әжібай.
Қаннан дарыған кәсіпті игерген жас шебер әкесінің қасында жүріп ат әбзелдерін әзірлеудің қыр-сырын меңгерген. Кейін осы істі дөңгелетуді жөн санап, жобасын «Тәуелсіздік ұрпақтары» бастамасы арқылы дамытуды көздеген. Нәтижесі жаман емес. Қайтырымсыз гранттың арқасында бизнесі өрге домалап, тапсырыс ауқымы арта түсіпті.
– «Тәуелсіздік ұрпақтары» жобасы аясында ұтқан 1 млн теңге қаражат отбасылық кәсібіміздің дамуына көп ықпал етті. Өйткені көктем, жаз мезгілдерінде тапсырыс азаяды. Шығын шығатын кездер де болады. Осының орнын жабуға және сапалы былғары алуымызға гранттың көмегі көп тиді. Материалдың жақсы болғаны ертоқымды сатып алушылардың да көңілінен шығып жатты. Осылайша тапсырыстың саны уақыт өткен сайын арта түсті, – деп жас кәсіпкер мемлекеттің қолдауын ерекше атап өтті.
Беріктің «Тәуелсіздік ұрпақтары» жобасы жайлы білуіне бірден-бір себепкер Қарасай аудандық жастар ресурстық орталығы екенін де айта кету керек. Орталық жастары мемлекеттің осындай ұтымды бастамаларын аудан көлемінде дәріптеуден қалыс қалған емес. Олар мемлекет ұсынған бағдарламаларды жастар арасында насихаттап, жаңашылдыққа бастайды.
Берік Әжібай мектеп оқушысы болғандықтан, осы кәсіптік ісін сабақтан кейін жалғастырады. Түске дейін білім алса, түстен кейін шеберханадағы міндетін орындап, әкесі мен бауырларына көмектеседі. Беріктің ендігі арманы – атасының жолын қуып, осы кәсіпті жоғары деңгейде дамытып, үлкен цех ашу.
– Жамбыл облысы Мойынқұм ауданында менің атамның атқа қажетті жабдықтарды дайындайтын үлкен цехы болыпты. Мен де атам сияқты осы бизнесімді одан әрі жетілдіріп, ауқымы кең ғимаратта жұмыс істегім келеді. Сөйтіп, қолөнер саласын көпке таныстырып, оны жан-жақты дамытсам деймін. Бір жағынан елдің экономикасын арттыруға қосқан үлесім болар еді, – дейді Берік Әжімбай алдағы арманын айтып.
Талабы таудай жас шебердің алдағы ісіне сәттілік тілейміз! Қазақтың қолөнерін таныту арқылы табыс тауып отырған ізденімпаз оқушының болашағы жарқын болсын демекпіз. Арманы асқақ балалардың жастайынан еңбекқор болғаны кімді болсын қуантарын анық.
Айта кетейік, Беріктің ата кәсібін жетілдіруіне себепкер болған «Тәуелсіздік ұрпақтар» деп аталатын жобасы әлі же жалғасуда. Бұл бастама Мемлекет басшысының қолдауымен жүзеге асып келеді. Ресми дерекке сүйенсек, былтыр аталған жобаның аясында Алматы облысында 10 жас кәсіпкер 1 млн теңгеден қаржылай қолдауға ие болған. Қазіргі уақытта олар әр салада өз кәсібімен айналысып, жемісін көруде.
2023 жылы «Тәуелсіздік ұрпақтары» бойынша 3 млн. теңгеден 30 грант берілу көзделген. Әлі де байқауға қатысуға мүмкіндік бар. Жобаның мақсаты – белсенді шығармашыл жастар қауымдастығын қалыптастыруға бағытталған жастардың жаңа және қолданыстағы бастамаларын мемлекет тарапынан қолдау.
Конкурсқа Қазақстан Республикасының 14 жастан бастап, 35 жасқа дейінгі азаматтары үміткер бола алады. Гранттар бес бағыт бойынша беріледі:
«Ғылым» – ғылымның басым секторларында жаңа ғылыми жобаларды және зерттеулерді іске асыруға арналған;
«Мәдениет» – Қазақстанның мәдени мұрасын танымал етуге, халықтық мәдени дәстүрлер мен өнерді ілгерілетуге бағытталған жобаларды іске асыруға арналған;
«Ақпараттық технологиялар» – жаңа IT шешімдер мен жобаларды, оның ішінде жаңадан басталған start-up жобаларды іске асыруға және әзірлеуге арналған;
«Бизнес» – экономиканың басым секторларында жаңа бизнес-идеяларды іске асыруға арналған;
«Медиа» – жаңа медиа-жобаларды, оның ішінде жастар үшін танымдық, пайдалы, қызықты контент құру жөніндегі жобаларды іске асыруға арналған.
Үміткерлердің конкурстық өтінімдері ағымдағы жылдың 26 қыркүйегінен 26 қарашасына дейін жалғасады. Қосымша ақпаратты Қарасай аудандық жастар ресурстық орталығынан білуге болады.
Дидар МӘЛІКҰЛЫ.