Жақында Талғар қаласында аудан мен қала әкімдіктерінің, Алматы облысы дене шынықтыру және спорт басқармасының қолдауымен, ауданның бұқаралық спорттық іс-шараларды өткізу орталығының ұйымдастыруымен жүгіруден шағын марафон өтті. Халық арасында саламатты өмір салтын дәріптеуді көздеген бұл шараға барлық ауылдық округтерден 100-ден аса аудан мен қала тұрғындары қатысып, жарыс жолында бақтарын сынады.
«Жастар» стадионындағы марафонның ашылу салтанатында Талғар ауданының бұқаралық спорттық іс-шараларды өткізу орталығының басшысы Жандос Аянбекұлы сөз сөйлеп, қатысушыларға сәттілік тілеп, жарысты ресми түрде ашық деп жариялады. Сонымен қатар республикалық «Ер-намысы» қоғамдық бірлестігінің төрағасы Ерболат Алиядин ақ батасын берсе, ауданның «Волейбол» федерациясының төрағасы Жұмағали Тұрсынұлы ауданның бұқаралық спорттық іс-шараларды өткізу орталығына шынайы ел атынан алғысын білдірді.
Марафон барысында бағдарлама бойынша 18-39 жас аралығындағы қатысушылар екі шақырымға, 40-49 жастағылар 1,6 шақырымға, 50-59 жастағы желаяқтар 1,2 шақырымға, 60-тан асқандар 800 метрге жүгіріп, бақтарын сынады.
– Осы шараға қатысқанымызға өте қуаныштымыз. Саламатты өмірді осылай насихаттаудың жастар үшін маңызы өте зор. Себебі жарысқа қатысушы әрбір адам спортты тұрақты түрде жанына серік етеді. Ал дене шынықтырумен күнделікті айналысқан жастың өзіне де, қоғамға да тигізер пайдасы көп, – дейді жарысқа қатысқан тұрғындар.
Жарыс жолына шыққандардың арасында 70-тен асқан ата-әжелеріміз де болды. Олар жиналған жұртқа ерекше көңіл-күй сыйлап, көпке үлгі көрсетті.
Марафонға белсенділік танытқандардың саны көп болғанымен, жарыс жолында жеңімпаздарда дара көрінетіні рас. Атап айтқанда, 20 жастағы М.Тайгирұлы, 36 жастағы Н.Юсупов, 38 жастағы Б.Спақбаев, 44 жастағы Л.Карибаева, 66 жастағы Е.Мекенов, 70 жастағы И.Каракеева, 72 жастағы А.Ауғанова, 73 жастағы К.Алимжанов марафонда бірінші болып келді. Аталған жеңімпаздар Талғар ауданының бұқаралық спорттық іс-шараларды өткізу орталығының қаржылай сыйлықтарымен, арнайы дипломдарымен марапатталды. Сондай-ақ жүлдегерлерге медаль, кубок, мақтау қағаздары табыс етілді.
Айта кетейік, жарысқа аудандық «AMANAT» партиясы, «Ақ бұлақ» спорттық сауықтыру кешені, «Сұлтан» монша комплексі, «Такеши» суши мейрамханасы, «Triumpher» фитнес орталығы, «Тау-Асу» отбасылық демалыс орталықтары демеушілік көрсетті.
Сәуле ҚҰРМАНТАЕВА.
Талғар ауданы.